أحمد زاهر عن مرض ابنته الصغرى: «بموت لما بشوفها بتتخنق.. وبقول أنا السبب»

ظهر الفنان أحمد زاهر متأثرًا، أثناء حديثه عن أصغر بناته «نور»، بسبب المرض الذي ورثته منه.

قال أحمد زاهر عبر تصريحات تلفزيونية: «جالي مرض في الغدة وكنت في حالة صعبة أوي وباخد دواء مدى الحياة».

وتابع: «بنتي نور الصغيرة اكتشفت أن جالها الغدة الدرقية لأني خلفتها بعد المرض، أنا كنت بموت وبلوم نفسي لأن أنا السبب».

واستكمل أحمد زاهر: «هو كله قدر ولكن إحساسي أنا اللي ورثتها المرض بيوجعني أوي والأعراض المشتركة بيني وبينها أول حاجة زيادة الوزن أنا وزني كان وصل لـ185 كيلو، وهي عندها وزن زايد بسبب المرض، ولما تيجي تعيط بتتخنق وصوتها بيروح وبتوجع قلبي وكل ما أشوف ده أقول أنا السبب وأدخل الأوضة أقفل على نفسي وأنهار».

وقال أيضًا: «لأن فعلاً أنا السبب يعني أنا لو مكنش جت الغدة قبل ما أخلفها ماكانتش جتلها وبوديها لدكاترة وبشوف الأدوية ولما لقيت الأدوية مش بتعمل حاجة بروح لدكتور تاني وبدأت تخس شوية».

واختتم أحمد زاهر: «أنا كان بيجيلي عرض غريب أبقى قاعد بتكلم عادي وفجأة أنام واتقلبت مرة بالعربية لأني نمت، أنام لمدة 10 دقايق أو ربع ساعة، ولما تصحيني أرجع أرد على آخر سؤال اتقال وبنسى أني نمت، بس الحمدلله دلوقتي لأ مش بتجيلي الأعراض دي».