أنغام باكية بسبب الزج باسمها في أزمة شيرين: كفاية ظلم وحقد

ردت الفنانة أنغام على شائعات الزج باسمها في أزمة الفنانة شيرين عبدالوهاب بعد حفلها في مهرجان موازين، وما تردد عن أنها سبب وراء حملة ممنهجة ضد شيرين.

قالت أنغام عبر تصريحات تلفزيونية: «أنا مكنتش مصدقة الكلام خالص.. أنا مش من الشخصيات اللي بتحب تدافع عن نفسها ولا بترد على الشائعات، ولا بدخل في مهاترات، وده منهجي في حياتي من زمان سواء على المستوى الشخصي أو المهني، أنا طول عمري بسيب الأمور تختفي لوحدها، وربنا بينصفني دايمًا».

رد أنغام على الزج باسمها في أزمة شيرين عبدالوهاب

واستكملت: «أنا ست اللي يعرفني كويس عارف إني مش بتاعة مشاكل، ولا بدعي المثالية، أنا إنسانة عادية بحب شغلي وبحترم جمهوري، وحتى اللي مش بيحبني بحترمه، لأن مفيش فنان بيتفق عليه كل الناس، وده طبيعي لأن الأذواق بتختلف، الظلم المرة دي غير محتمل، لا قادرة أتكلم ولا قادرة أسكت، لكن الأمر وصل لدرجة التجريح والشتايم والتلميحات اللي مش مقبولة من ناس المفروض مسؤولين وزملاء».

وأضافت أنغام: «البعض بيقول إحنا عارفين مين ورا الحملة، والفانز بتوع المطربة المنافسة بيتكلموا وكأنهم عارفين حاجة، وفي مواقع كتبت اسمي بشكل مباشر، ليه الشتيمة والتجريح وأنا في المستشفى؟! محدش كان يعرف غير أقرب الناس ليا... وأنا على سرير المستشفى لقيت ناس بتبعتلي وبتشتمني وأنا مالي! هو أنا ليّا علاقة بالمشكلة اللي حصلت في الحفلة؟! أنا مالي! ضمائركم راحت فين؟!».

تصريحات أنغام

وقالت أيضًا: «حتى لو مكنتش في المستشفى، مالي؟! أنا تحملت 4 سنين من التلميحات حتى منها شخصيًا، ومع ذلك مردتش ولا مرة، كنت بزعل بيني وبين نفسي وكنت بعذرها كتير.. لكن نوصل لمرحلة توجيه الناس ضدي؟! تطلعوني كأني بتآمر وأقود حملات ضد زميلة؟! ده ظلم وحرام وعيب، أنا لا أتهمها شخصيًا، لكن في ناس حواليها بيقولوا كده وبيوجهوا الناس لكده.. أنا مش هقول إني أكبر من كده وهي كمان أكبر من كده، بس عيب اللي بيحصل، واللي بيحاولوا يقربوا منها بطريقة مغلوطة يقولوا لها تحبها وتشجعها براحتك، لكن مالهمش دعوة بيا».

واستكملت أنغام محذرة: «أي شخص هيتمادى وهيجيب سيرتي، مش هسكت.. أنا فعلاً تعبت.. ورفعت قضية على شاب قبل كده كتب عني على تويتر وقال (مش هترحمي شيرين يا أنغام) وكسبت القضية اتحبس.. وأي حد هيتجرأ تاني ويزج باسمي مش هسكت»، ولم تتمالك نفسها خلال المداخلة باكية، وقالت: «كفاية ظلم، كفاية كره، كفاية حقد أنا تعبت.. سبوني في حالي.. محدش ليه دعوة بنيتي، ربنا اللي هيحاسبني، كفاية توجيه حملات ضدي، ولما إعلامي يطلع يدافع عن شيرين له كل الاحترام، لكن وأنت بتبص على شيرين، بص كمان على أنغام اللي مالهاش علاقة بالموضوع، كفاية مقارنة عقيمة ومؤذية، هي اسمها شيرين وأنا اسمي أنغام، ليها جمهورها وليا جمهوري.. ربنا يكرمنا كلنا، متدعيش لي، لكن على الأقل بلاش تدعي عليّ وتظلمني».

أنغام تتعرض لوعكة صحية

كما كشفت تفاصيل حالتها الصحية وسبب دخولها المستشفى، قائلة: «أنا فعلًا في المستشفى بعد وعكة صحية حصلت بشكل مفاجئ يوم الأربعاء الماضي.. شعرت بتعب شديد وتم نقلي للمستشفى صباح السبت، الحقيقة مكنتش عايزة حد يعرف علشان كنت تعبانة جدًا ومكنتش قادرة أستقبل زيارات ولا أشرح حالتي الصحية، فقررت مفيش داعي أقول علشان أرتاح شوية، وكنت فاكرة إني داخلة المستشفى يوم واحد آخد مسكنات وأعمل فحوصات وأخرج، لكن الموضوع طلع محتاج فترة أطول، والحمد لله الموضوع بسيط بس محتاج صبر واستشارات».

واختتمت أنغام برسالة مؤثرة لجمهورها قائلة: «أنا عايزة من الناس اللي بتحبني مايحطونيش في مقارنة مع حد. حبوني علشاني أنا، مش علشان أكون أحسن من حد.. ماتقارنيش بحد، ولا تقارنوا حد بيا حتى لو المقارنة في صالحي، أنا مش عايزاها.. ده شيء مش مقبول ومش بيكبرني، ولو بتحبوني بجد، مش ده الأسلوب اللي تقدروا تكرموني بيه أو تدعموني بيه. لو سمحتوا، متحطونيش في مواقف تخلي الناس تعتقد إن أنا زقتكم تعملوا ده».