التفاصيل الكاملة لأزمة دينا حرب.. فريد النقراشي يكشف حقيقة وفاتها بعد 7 سنوات

كشف الفنان فريد النقراشي مفاجأة عن الفنانة اللبنانية دينا حرب، والتي ظن الكثيرون أنها توفيت قبل 7 سنوات، حيث أنها مازالت على قيد الحياة.

كتب فريد النقراشي في منشور على حسابه الرسمي بموقع فيس بوك: «دينا حرب ماتت ولا لأ.. اللي مش فاكر الممثلة اللبنانية (دينا حرب) هي اللي كانت مع محمد فؤاد في فيلم (غاوي حب) وشاركت في فيلم (45 يوم) وفيلم حلم العمر، وأمن دولت، وجدو حبيبي.. وغيرها».

وتابع: «لو دخلت وكتبت أسمها على Google هيطلعلك تاريخ ميلادها وتاريخ وفاتها.. لكن المفاجأة بقى من كام يوم لقيت (دينا حرب) بتكلمني من لبنان وهي عايشة هناك حاليًا مع أسرتها. أيوه دينا (المرحومة) اللي خبر وفاتها منتشر اتصلت بيا وكانت متضايقة جدًا ومش فاهمة ليه خبر موتها (وهي عايشة) منتشر بالشكل ده».

واستكمل: «أيوة زي ما أنت سمعت هي عايشة بالرغم زي ما قلتلك لو كتبت على محرك البحث Google اسمها هيطلعلك تاريخ ميلادها وتاريخ وفاتها.. هي كانت مستغربة ومش فاهمه ومتضايقة جدًا وحاسة إن أكيد فيه حد ورا الإشاعة دي بس مش عارفة ليه يطلع عليها إشاعة بالشكل ده.. وليه تتحول لمعلومة رسمية تتكتب على كل المواقع بمجرد أنك تكتب اسم دينا حرب».

وأضاف فريد النقراشي: «ولما دورت اكتشفت عبث السوشيال ميديا اللي إحنا بقينا عايشين فيها وبيها.. فيه خبيرة تجميل ليها نفس الاسم (دينا حرب) وماتت مخنوقة الله يرحمها نتيجة تسرب غاز في منزلها.. وعشان الصحافة الإلكترونية عندنا مش كل اللي بيشتغل فيها بيتحرى الدقة راحوا مشيرين صورة الممثلة (دينا حرب) بدل خبيرة التجميل، وقالوا إنها ماتت مخنوقة في نفس تاريخ وفاة خبيرة التجميل».

واختتم: «والخبر انتشر على المواقع وخده مواقع كتير منها ويكيبيديا والسينما.كوم وغيرهم كتير.. شيء مؤلم وجارح أن كل الناس تتداول خبر وفاتك وتكتبه وتوثقه وأنت على قيد الحياة حي ترزق.. ياريت نتحرى الدقة بالذات في المعلومات اللي من النوع ده قبل ما نكتبها.. ورجاءً تصحيح الخطأ (دينا حرب) الممثلة عايشة وبصحة جيدة وربنا يديها طولة العمر.. معلش يا دينا ألف مليون سلامة عليكي من الموت وربنا يديكي طولة العمر».