السيستم واقع.. مصطفى بكري يكشف أزمة صرف المعاشات لبعض المواطنين منذ ديسمبر

أثار الإعلامي وعضو مجلس النواب مصطفى بكري أزمة تأخر صرف المعاشات لعدد من المواطنين من شهر ديسمبر الماضي، مؤكدًا أن هناك حالة قلق مستمرة منذ ديسمبر الماضي بسبب توقف الصرف لفئات مختلفة، بينها أصحاب المعاشات الجدد والمستحقين وأصحاب العجز.

وقال بكري خلال برنامج حقائق وأسرار المذاع على قناة صدى البلد: من شهر ديسمبر اللي فات لحد النهاردة، ناس كتير عايشة في قلق بسبب توقف المعاشات… ناس خرجت معاش بعد سنين خدمة، وناس مستحقة معاش أهاليهم، وبعد ما يخلصوا كل الإجراءات، يتفاجئوا إن المعاش واقف بسبب السيستم اللي واقع.

وأضاف: كلمة صغيرة لكن أثرها كبير.. «السيستم واقع.. في مشكلة  تعالى الأسبوع الجاي»، طيب الناس تعيش إزاي؟ والمريض يجيب علاج منين؟ والأسرة تصرف منين؟.

وتابع: الحكاية مش أرقام على شاشة، دي بيوت حقيقية وناس بتتألم… أرملة بتستلف، ورجل كبير بيسأل كل يوم معاشه هينزل إمتى؟، وشاب مريض مستني حقه.

وأكد: إحنا مع التطوير والرقمنة، لكن أي تطوير ميحسش بالناس يبقى ناقص… المواطن مش المفروض يدفع تمن أي عطل.

واختتم: «الناس تعمل إيه لحد الأسبوع الجاي؟.. المريض يجيب علاج منين؟.. صاحب البيت ياخد إيجاره إزاي؟.. الأسرة اللي عايشة على المعاش ده تعيش منين؟.. الحكاية مش أرقام على شاشة ولا ملفات متأجلة على مكتب.. أرملة كانت مستورة بمعاش جوزها بقت تستلف علشان تعرف تكمل الشهر».