بعد انتقاد رد رامي صبري على استغاثة نادر نور.. هل يعاني سوق الغناء من قلة عدد المطربين وغياب الأفكار الجديدة؟

تسببت استغاثة الملحن نادر نور من قلة العمل وعدم رد بعض المطربين عليه، في ضجة واسعة وجدلًا كبيرًا، حيث تعرض الفنان رامي صبري لانتقادات بسبب رده وناقش الفنان رامي جمال والفنانة إيناس عز الدين والشاعر مصطفى حدوتة أزمة قلة عدد المطربين والتجديد في الأفكار.

علق رامي صبري على أزمة بعض الملحنين وآخرهم نادر نور، وكتب عبر خاصية الستوري التابعة لحسابه الرسمي بموقع انستجرام: «عدم الرد على ملحنين ومؤلفين أو مبدعين بشكل عام هو عدم التجديد وأن مفيش أفكار مختلفة».

انتقادات ضد رامي صبري بسبب رده على أزمة نادر نور

ورد رامي صبري على الانتقادات التي تعرض لها، بعدما كشف سبب عدم رده على عدد من الملحنين والشعراء الذي يرغبون في العمل معه.

وقال: «مش عارف فيه ناس متضايقة أوي إني كتبت ستوري بقول فيها إن الملحنين اللي بيبعتولي شغل مابيعملوش حاجات مختلفة، دي حقيقة، يعني أعملها وخلاص علشان هي بتتبعتلي!.. أنا بعمل الحاجات اللي شايفها من وجهة نظري أنا إنها مختلفة وجديدة، فده مش المفروض إنه يضايق حد، والمشكلة مش في الملحنين والشعراء كلهم كويسين، بس إحنا الفكرة كمطربين في السوق 10 بالكتير بس الملحنين والشعراء كتير، فالموضوع صعب إنك تشتغل مع المطربين.. وبشكر معالي المستشار على دعمه لينا دائمًا كفنانين، وأتمنى التوفيق للجميع».

وعلق رامي جمال على حقيقة قلة عدد المطربين في مصر مقارنة بعدد الملحنين والموزعين، حيث كتب على حسابه بموقع فيس بوك: «حبايبي الصناع الغاليين أنا بحكم إني منكم إحنا الزمن غير الزمن ومبقاش فيه شركات إنتاج وفعلا عددنا كمطربين قليل أنا من الناس اللي دايمًا بحاول يبقى معايا ناس جديدة وناس من زمايلي وجيلي بس أنا عندي رأي مهم مصر ماينفعش تبقى 10 مطربين رجالة وستات بس.. الزمن بتاع الديجيتال ده فرصتكم إنكم تعملو مشاريع إنكم تجيبو أصوات نسائية جديدة وأصوات رجالي جديدة ولو في زملاء من أي جيل مبقاش في حد بينتجله تقدرو تعملو معاه اتفاق إن كل واحد فيكم ياخد نسبة من المشروع مقابل أجره والله ده المستقبل لأن في الأخر ده أبقى ليكم.. مصر محتاجة أصوات نسائية ضروري وطبعًا رجالي يعني سخرو موهبتكم لمساعدة بعض وخدمة نفسكم وخدمة مصر اللي ما ينفعش يبقى فيها عدد عظيم من الصناع قدام عدد محدود من المطربين وربنا يفتح أبواب الرزق من وسع للكل وأنا شخصيًا آسف لكل موهوب زعل مني في يوم إن مكنش فيه بينا تعاون وندمو اللي ما آمنش بموهبتكم بشكل عملي».

تعليق الفنانين على قلة عدد المطربين

وقالت المطربة إيناس عز الدين في منشور عبر حسابها بموقع فيس بوك: «الناس طول الوقت بتلومنا على عدم طرح أعمال جديدة وبنقرأ تعليقات كتير من نوعية أنتوا مقصرين في حقنا كجمهور، بطلتوا ليه تعملوا أغاني خاصة بيكم، أنتوا محتاجين أدارة شاطرة تعملكم أغاني.. الجمهور مايعرفش إيه داير في المطبخ ومايعرفش إننا في معاناة كبيرة وإن سوق الأغاني كله بيلعب فيه من خمس لعشر نجوم فقط وأغلبهم لو النهاردة بطلوا مش هتلاقي جيل جديد يستلم منهم الراية مش علشان مافيش موهوبين لكن علشان السوق بقى احتكار من كل النواحي من أول الكلمة واللحن والتوزيع لحد المطربين.. تورتة بتتقسم 11 قطعة كل نجم في مجاله أخد قطعة كبيرة لوحده وقطعة واحدة أخيرة بتتقطع وتتفرق على كل الموهوبين اللي فاضلين.. بقى دلوقتي مطلوب من المطرب يبقى مطرب ومنتج ويشق الأرض تطلع فلوس علشان يقدر ينتج عمل فني وبرضو بنسبة كبيرة حتى لو نجح مش هيعرف يثبت وجوده وسط باقي الحيتان اللي كل واحد فيهم بيزنق جنب التاني علشان ما يسيبوس مجال ولا مكان فاضي ولو بسيط لحد صغير يدخل وسطيهم.. هو أنتوا فاكرين مصر بحالها مافيهاش موهوبين في كل مجال غير العدد اللي بتعد على صوابع الإيد الواحدة اللي ظاهرين دول؟.. مصر مليانة مواهب عظيمة لكنها مدفونة والجمهور قايم بدور المتفرج والناقد فقط للأسف للموهوبين وبيحملهم ذنب مش ذنبهم».

بينما قال مصطفى حدوتة في فيديو تعليقًا على الجدل المثار: «بضم صوتي لصوت الفنان رامي صبري، لكن بختلف معاه في نقطة واحدة أن فيه 70 شاعر وملحن ونسي يقول أن فيه مصطفى حدوتة فالمفروض تبقوا زي مصطفى حدوتة بتعملوا أفكار جديدة».