جميلة عزيز: مريت بوعكة صحية ومكنش عندي غير ربنا ودكتور أشرف زكي

كشفت الفنانة جميلة عزيز، تفاصيل دخولها الوسط الفني، بجانب الكشف عن تفاصيل إصابتها بوعكة صحية كبيرة خلال الفترة الماضية وارتدائها الحجاب.

جميلة عزيز تتحدث عن بدايتها

قالت جميلة عزيز، في تصريحات تلفزيونية': بدأت الفن مع الفنان الأستاذ محمد صبحي، مقدرش أنكر جمايله عليا هو اللي حببني في الفن، على الرغم من أنه شديد في شغله، لكن شدته دي بتحبب الفنان في الفن وبتعلمه، كانت أول خطوة بالنسبة ليا خطوة حلوة، وهو اللي رشحني لمسلسل يوميات ونيس'.

مرض جميلة عزيز

وتحدثت جميلة عزيز عن تفاصيل وعكتها الصحية، وقالت: 'أخر عملين ليا كانوا أفراح إبليس والشوارع الخلفية، وبعدين جاتلي وعكة صحية وخدت عهد بيني وبين ربنا أني أطلع من الوعكة دي وأتحجب، كانت وعكة صحية شديدة جدًا وكنت فيها لوحدي، وكان تعبي النفسي أكتر من الصحي، واللي بيمرض وهو لوحده وأعز أصحابه وأحبابه مش معاه وتخلوا عنه وقت المرض غير اللي عنده ضمير وأصل'.

وأضافت: 'أنا أمي متوفية ووالدي راجل كبير في السن، فمكنش عندي غير ربنا، والناس اللي عندهم ضمير زي الدكتور أشرف زكي، والنقابة كانوا واقفين جنبي وبيسألوا عليا'.

تصريحات جميلة عزيز

واستكملت جميلة عزيز حديثها، وقالت: 'كانت في صديقة ليا حميمة في الوسط الفني هي فنانة وبناكل وبنشرب مع بعض، وصلها إني تعبانة ومرفعتش سماعة التليفون تسأل، مع أن كان في خلاف بسيط جدًا بيني وبينها زي أي أصحاب ولكن ساعة المرض المفروض ينسى كل حاجة، وأقل حاجة ارفعي السماعة وأدعميني دعم نفسي، والدعم الفني ده بيخفف'.

واختتمت كلامها وقالت: 'لغاية دلوقتي مفيش أي تواصل بينا، ولما حصلها ظروف سألت عليها وقولت لوالدتها أنا مش هقدر أجي ليها دلوقتي لأني تعبانة وباخد دواء، قالتلي سلامتك وهنجيلك، ومحدش جه، وكان عندي أمل أنها تيجي وتسأل عليا، عمري ما هنسى، أنا وقفت جنبها وقفات جدعنة كتير ومبتأخرش عليها'.