زياد ظاظا وفليكس ينهوا خلافهم ويطرحو تراك جديد بعنوان "سبني على دول"

فاجئ الرابر زياد ظاظا جمهوره بإطلاق أحدث تراك له بعنوان 'سبني على دول'، بالتعاون مع الرابر فليكس، في لقاء غير متوقع بين اتنين من أبرز أقطاب موسيقى 'الدريل' في الجيل الجديد. التراك تم طرحه منذ ساعات، وبيمثل أول تعاون فني بين ظاظا وفليكس بعد خصومة استمرت أكتر من 3 سنين.

التراك اتصور في قلب الفيوم، وتحديدًا منطقة الشيخ حسن، مسقط رأس ظاظا، وشارك فيه عدد كبير من أهل المنطقة في الكليب، وده تحت إخراج محمد صبحي، وميكس وماستر كينجو، اللي دايمًا بيشتغل مع ظاظا على مشاريعه الموسيقية.

المفاجأة مش بس في التراك نفسه، لكن كمان في كسر القطيعة بين فليكس وظاظا، خاصة بعد انفصال فليكس عن فريق 'معادي تاون مافيا'، وده اللي خلّى التعاون ده يُعتبر حدث مهم ومثير في مشهد الراب المصري والعربي، لإنه أول مرة بيحصل تعاون بين رابرين كان بينهم خصومة علنية.

على الجانب التاني، ظاظا كان مؤخرًا نجم في أول حفلاته الأوروبية بمهرجان 'نوافذ' في هولندا، بحضور عربي ومصري كبير، وده بعد مشاركته في مهرجان 'كان' بفيلم 'عائشة لا تستطيع الطيران'.

أما فليكس، فدخل تمثيل رمضان اللي فات من أوسع أبوابه، وقدم شخصية 'ألمظ' في مسلسل 'ولاد الشمس'، وكان الأخ الرابع لمجموعة شباب دار الأيتام اللي قام بأدوارهم أحمد مالك وطه دسوقي ومعتز هشام.

رجوع التعاون بين فليكس وظاظا بيشير لتغيرات مثيرة في شكل سين الراب المصري، وممكن يبقى بداية لموجة مصالحات فنية جديدة بين رابرز الجيل ده.