زيزي عادل تعلن اعتزالها الفن .. « عايزة اموت وربنا راضي عني»
أعلنت المطربة زيزي عادل اعتزالها مجال الغناء نهائيًا، مشيرةً إلى أنها قررت الابتعاد عن الشهرة.
ونشرت زيزي عادل فيديو عبر حسابها الشخصي على موقع تبادل الصور والفيديوهات القصيرة «انستجرام»، قائلةً: «طالعة أقول خبر مهم في حياتي وأهم وأحلى خبر في حياتي وهو اعتزالي الغناء، والقرار مخدتوش من امبارح ووخداه من فترة كبيرة جدًا ».
وأضافت، «مطلعتش أقوله لأني كنت حابه أتكلم مع نفسي والقريبين مني في الموضوع ده وبيشجعوني جدًا أعمل ده، وببعد عن أكتر حاجة مغرية في الدنيا وهي الشهرة».
وتابعت حديثها، «الفترة اللي فاتت قربت من ربنا جدا، ولقيت القرآن بيقولي إني لازم أكون ملتزمة، لازم أكون على قد ما أقدر أكون ملتزمة، ويمكن تكون مستغربين، إني طالعة بشعري ومش محجبة، ده لإن ربنا لسه ما أنعمش عليه بخطوة الحجاب، وبدعي ربنا إني ألبس الحجاب، وكل حاجة بتيجي خطوة خطوة، مفيش حاجة بتيجي مرة واحدة، فأنا خدت خطوة وإن شاء الله تيجي الخطوة اللي بعدها».
واصلت زيزي عادل: «عايز أقولكم كمان إني بالنسبة للفن هو مصدر دخلي، أنا سبت حاجة بعيش منها، ولكن أنا سبت ده وعارفة إن ربنا هيرزقني، ربنا مبينساش حد، فسايبه ده على ربنا، ومعنديش مشكلة، بالعكس راضية جدا على القرار اللي أنا أخدته ومبسوطة بيه جدا، وحابه اللي جاي من حياتي، ويمكن بعد ما أخدت القرار ده، تعرضت لمواقف اختبار من ربنا، ولما سألت أهل العلم أفتوني بكده، وكنت محطوطة تحت ضغط أوافق أو ما أوافقش، والاختبار كان بالنسبالي صعب شوية، خصوصا إن البني آدم ضعيف، ويمكن العرض اللي جالي مجاليش وأنا بمارس المهنة، والحمد لله قدرت أقف بدعم من الناس اللي حواليا».
واستطردت: «مش عايزة أخش في حتة الفن حلال والفن حرام، عشان مبقاش طالعة بتكلم كإني داعية، أنا طالعة أتكلم كزيزي، وطالعة أقول إني بطلعت أغني، لإني مش صح، وديني بيقول كده، وأنا حابة إني أموت وربنا راضي عني، وكلنا نمتنى حاجة زي دي، وعايزة أموت اكون مستعدة لمقابلة ربنا، وأكون راضية عن نفسي وعن حياتي وعن شخصي وعن أفعالي، والحمد لله التزمت، وقربت من ربنا طبعا بطريقة كويسة، وربنا يكرم والتزم أكتر وأكتر، وعايزاكم تدعولي ربنا يثبتني».
القصة الكاملة لتأييد إعدام محمد عويس و21 آخرين في ذكرى استشهاد البطل محمد مبروك
تابعوا قناة صدى البلد على Google News
تابعوا قناة صدى البلد على تطبيق نبض
