شريف منير يكشف مفاجآت عن فرقته "نوستالجيا": مكنتش مصدق نفاد تذاكر الحفلات

تحدث الفنان شريف منير عن فرقته الموسيقية نوستالجيا وكشف مفاجآت عن أعضائها.

قال شريف منير ببرنامج سبوت لايت مع الإعلامية شيرين سليمان على قناة صدى البلد: «فرقة نوستالجيا حلم ظهر في حياتي عرفت أحققه وحققته بنجاح وكونت مجموعة من الموسيقيين اللي بعتز بهم وبحبهم دول أخواتي الصغيرين وولادي وكلهم على مستوى عالي من الثقافة والتعليم من ماجستير في الكونترباص لخريجي الموسيقى العربية».

وتحدث عن أعضاء فرقته الموسيقية «نوستالجيا»، قائلًا: «مدير الفرقة عمر أحمد بعتبره عازف جيتار عالمي وعلاء فراج الكيبورديست عشرة عمري من سنة 1984 وساعدني في تكوين الفرقة ووقف معايا في البروفات، ومحمد عشري بيلعب كونترباص ومحضر ماجستير في الكونترباص وإسلام التوني عازف كمان متخرج من الموسيقى العربية جامد جدًا وماريز لحود مغنية جميلة بدأت من بداية الفرقة».

وأضاف: «ومحمد شبل بعشقه عشق بحب دايمًا يبقى جنبي بيحسسني بطمأنينة وراحة، وعمر الطودي عازف كيبورد وهو حالة خاصة بالنسبة لي لأن والده بطل من أبطال جهاز المخابرات العامة زمان اشترك في تدريب رفعت الجمال، فإحنا فرقة موسيقية وطنية فنية واللي جاي في المستقبل بنختار أغاني لمصر هنعملها».

وعلق شريف منير على نفاد تذاكر حفلاته، قائلًا: «مصدقتش قولتلهم مش ممكن ومكنتش متخيل ولا متوقع وبشكر الجمهور على الثقة دي ويارب أكون على مستوى الثقة دي وأهل الأوبرا يكونوا شايفين إني عملت حاجة كويسة».