شمس البارودي تدافع عن شهيرة وتكشف أسرار رعايتها لمحمود ياسين لـ5 سنوات

دافعت الفنانة شمس البارودي عن صديقتها الفنانة شهيرة، وأكدت أن مهاجميها لا يمكنهم الوصول لرقيها وجمالها.

وقالت شمس البارودي في فيديو نشرته عبر حسابها الرسمي بموقع فيس بوك: «عايزة أدافع عن شهيرة، إنتوا إيه إنتوا ما تقدروش توصلوا لرقي الست دي وإخلاصها وجمالها».

وتابعت: «ماكانتش أنتيمتي هي التزمت بعدي بفترة، وكنا بنتجمع عند هالة فؤاد وقت مرضها وكان حبيب قلبي جوزي يقولي كلمي شهيرة اسألي على محمود».

واستكملت شمس البارودي: «النجم الكبير اللي الكل كان يتمنى يشتغل معاه، المهم كانت تحكيلي عن حاجات، متخيلين هذه الزوجة التقية المخلصة البارة بزوجها 5 سنين يا حبيبي مش عارف حد غيرها، كانت تحكيلي حاجات لما كنت أسمعها أقول أنا ما أقدرش أعمل اللي هي بتعمله».

واختتمت: «قعدت 5 سنين ترعاه إلا في الفترة الأخيرة، وجابتله سرير طبي في البيت، ولما حبيبي تعب أنا قلدتها وجبت سرير طبي وعملت الأوضة كلها عناية مركزة.. إزاي بتهاجموا الست دي، على فكرة فيه حاجة اسمها قانون العيب، أنا عايزة الريس يفعل القانون ده، وحقها إنها تطلع وافرضوا عايزة تمثل، ممكن تعمل الأم ويجيلها ملايين وتعمل تجميل زي اللي بيعملوا، ده فيه داخلين على التسعين وشكلهم صغير، شاطرين براحتهم معاهم فلوس، إحنا الحمد لله مستورين، وتشتغل ما تشتغلش ليه وابنها مؤلف ناجح جدًا».