صفاء جلال: كل ما أقدم عمل يكسر الدنيا أقعد بعده سنتين في البيت

تحدثت الفنانة صفاء جلال عن سر عدم وصولها إلى النجومية، بجانب أسرار من حياتها الشخصية وطفولتها.

قالت صفاء جلال عبر تصريحات تلفزيونية: «اخترت رقم 1 البيت ورقم 2 الشغل وعارفة إن ده مش هيخليني أوصل للنجومية المطلقة».

تصريحات صفاء جلال

وتابعت: «دايمًا النجم بيبقى رقم 1 في حياته هو شغله، أنا أهم حاجة عندي البيت وبعدين الشغل، وبحمد ربنا على كل اللي بيحصلي في حياتي ولما بيجيلي دور بشتغل عليه كويس وبهتم بكل تفاصيله عشان لما المشاهد يشوفه يحس قد إيه أنا تعبت فيه وأنه مختلف عن الأعمال اللي قدمتها فأنجح فيه».

واستكملت صفاء جلال: «والحمد لله نجاحي وحب الناس في الحاجات اللي بعملها ده مكسب كبير، النجومية ممكن تيجي وأنا كبيرة وحصلت مع ناس كتير لكن مش هزعل عليها لو مجتش».

صفاء جلال

 بدايات صفاء جلال

وقالت عن بداياتها الفنية: «في أول يوم ركبي خبطت في بعض وبكيت من الخوف والربكة والكسوف على المسرح، وكل ما بقدم عمل يكسر الدنيا بقعد بعده سنة أو اتنين في البيت بدون شغل، وبقول دا رزق ربنا والحمد لله».

وكشفت صفاء جلال مفاجأة عن اسمها، قائلة: «أنا اسمى صفاء علي الدرديري، وخلال عمل البروفات مع جلال الشرقاوي، قولت لهم اسمي، قالوا لا مش فني واختاروا لي اسم صفاء جلال، وعجبني الاسم واشتغلت وبدأت أمثل».

واختتمت: «أنا اتولدت في لبنان وبحبها لكن مارحتهاش غير مرة لتصوير عمل درامي وشعبها بيحب ينبسط، وأنا أم طيبة وديمقراطية وجوزي بيناديني في البيت يا حيرم».