فتوح أحمد: بختم القرآن أكثر من 5 مرات أسبوعيا.. والفن مش حرام طالما مبنعملش غلط.. فيديو

أكد الفنان فتوح أحمد حرصه على قراءة القرآن بشكل مستمر، مشيرًا إلى مشاركته في جروب لقراءة القرآن الكريم، كما رد على الجدل المثار حول حرمانية الفن، مؤكدًا أن الأمر يرتبط بالنية وليس بطبيعة العمل.

وقال خلال لقائه مع الإعلامية 'نهال طايل' في برنامج 'تفاصيل' المذاع على قناة 'صدى البلد2': 'في رمضان بحاول أختم القرآن مرة ، إلى أن من سنتين أو من 3 سنين مات صديقنا، عملنا جروب اسمه أحباب في الله بنقرأ قرآن على روحه، وبعدين على روح أمواتنا، فبقت المسألة بنقرأ أسبوعيًا بنختم مرة، ودلوقتي وصلنا إننا بنختم في الأسبوع 5 مرات، وفي رمضان كنا بنختم 7 مرات، ففي تسابق بينا، فكل واحد بقى كل واحد ومقدرته يعني اللي يقرأ جزء اللي يقرأ جزئين في الأسبوع تلاتة كل واحد ومقدرته يعني، فدخلنا في السباق ده'.

وأضاف: 'أنا في رمضان اللي فات، الأسبوع الأخير بس خاتم القرآن كله، الـ 3أسابيع اللي قبل كدا كان على الأقل في الأسبوع 15 جزء مثلًا، يعني أنا كنت بخلص تصوير وأبقى برا والله العظيم أبقى عايز أرجع جري للبيت عشان أقرأ، وبعدين هي أما تتعودي المسألة كانت صعبة أوي الأول تقعدي تقرأي في الجزء، لما بنقرأ كتير بتلاقي المسألة فبنلاقي الدنياسهلة  وبنقرأ صح طبعًا بالتشكيل فبنلاقي القرآن بقى سلس بقى سهل، بقيت لسه قارئ الجزء الأسبوع اللي فات لسه قارئ السورة دي الأسبوع اللي فات فالدنيا عملت راحة نفسية وبعدين قراءة القرآن دي يعني حاجة حلوة أوي أوي وبيقولوا القرآن هيشفع لنا'.

وأوضح: 'فيه فنانين حسوا إن اللي قدموه ده حرام وأخدوا فلوس وصرفوها وعاشوا بيها وجابوا عربيات وفلل وبعدين قبل ما يموتوا عايزين يشيلوها،  هو زي ما الشيخ متولي الشعراوي قال الكوباية دي لو حطيت فيها خمرة تبقى حرام، إنما فيها دلوقتي ينسون دي حلال، هو الفن كدا'.

وتابع: 'وبعدين مادام ما بتعملش حاجة غلط، بالعكس ده إحنا لسه بنقول عشان البلد دي تتطور لازم ننمي ده، هنمي ده عن طريق إيه؟ عن طريق الفن والدراما، مين قال إنه حرام ليه، إيه الحرام اللي فيها يعني؟ مفيهاش حرام ، وبعدين ربنا مدينا مخ، بصرف النظر بقى ربنا عارف أنا بعمل إيه، هل أنا بعمل حرام ولا بعمل لأ؟ الحرام بين والحلال بين ، إنما حتة بقى شيلوا أغانيا، احرقوا أفلامي لأ'.