كابتن صبحى .. 80 عاما ويمارس رياضة رفع الاثقال ..ونصيحته للشباب: أوعى حد يقولك أشرب دى

للوهلة الأولى يتصور من يشاهد المُسن المصري صبحي محمد، وهو يرفع الأثقال في صالة للألعاب الرياضية بالقاهرة، أنه رجل في منتصف العمر. لكن الرجل، الذي يتحدى الزمن، أكمل عامه الثمانين الشهر الماضي.

ويحرص الرجل على تمرين عضلاته ليحافظ على لياقته البدينة قوية على مر السنين من خلال تناول طعام صحي نظيف والمواظبة على التمرينات الرياضية.

وقال "أنا عشان بأحب الرياضة، بأعشقها، بأعشقها عشق زي ما تكون بتحب واحدة، أنا الرياضة عندي كده، هي دي اللي مخلياني ألعب. زائد بأحس بثقة في نفسي، الرياضة بتديك (تعطيك) ثقة، بدل ما تبقى ماشي رجليك بتخبط في بعض، بتبقى ماشي زي الحصان، هي دي الرياضة، جرب يا إنسان يا اللي ما بتلعبش رياضة إنك تلعب رياضة وشوف الفرق ما بين قبل وشوف بعد، هو ده الإنسان اللي عايز يعيش ويستمر في الحياة".

ويرى الرجل المُسن أنه مولود بميل طبيعي لممارسة الرياضة والحرص على التمرينات، مدعوما بتشجيع والده ومساندة أمه، التي كانت أحيانا تساعده ليرفع الأثقال في البيت.

وأضاف "هي التمارين قدرات، فيه ناس تيجي على النص ساعة وتقولك وقفت. في ناس تقولك بعد الساعة خلاص مش قادر، لأ. أنت قدراتك إيه، وبعدين بص لقدام، ما تقليش عندي كام سنة، السن العددي ده أنا ما بأعترفش به، أنا بأعترف بالسن الحياتي، السن الفرّش، السن اللي يخليك زي الطازة، زي الحاجة الطازة، أيوه هي دي الحياة، والأمل، كل دي لازم تحطه قدام(أمام) عينيك".

وعندما بلغ عمره سبع سنين بدأ يمارس لعبة الجمباز ثم بعد بضع سنوات بدأ في ممارسة المصارعة ورفع الأثقال التي يقول إنه أحرز فيها بطولات محلية عديدة على مستوى القطر المصري.

وبعد أن تقاعد ولم يعد يخوض بطولات خاصة بمحترفين استمر المُسن في ممارسة التدريب ست مرات في الأسبوع جامعا بين تدريبات رفع الأثقال وكمال الأجسام.

والآن نصحه طبيبه العام بأن يقلص أيام تمريناته إلى ثلاثة أيام فقط في الأسبوع لمدة بين ساعتين وثلاث ساعات في اليوم.

وقال محمد "فأنت صحتك في الرياضة، الهلاك ييجي للإنسان من عدم الرياضة، جسمك والعضلة هتبوظ، الكرش يبتدي يطلع، من 50 سنة هتهكع، وهتبقى ما لكش قيمة. لكن أنا بأقول لك أهه تعالى هنا، صحتك هنا، وابعد عن أي حد يقول لك اشرب دي أو تأخذ دي أو دي هتعمل فيك كذا، لأ ما تعملش أي حاجة من دي، وعيش مع الرياضة ومع الأكل الصحي بس".

وعندما لا يكون محمد في صالة الألعاب الرياضية يمضي وقته مع أحفاده لكنه يقول إنه لا شيء سيفلح في إبعاده عن رفع الأثقال.

https://youtu.be/OyOCPbSAbbM