لسه مروحتش المدرسة عشان مفيش فلوس.. حديث مؤثر من طفل سوهاج عن والده

شهدت محافظة سوهاج خلال الأيام الماضية قصة إنسانية لاقت تفاعلًا واسعًا على مواقع التواصل الاجتماعي، بطلها الطفل عبدالله، الذي خرج في مقطع فيديو يعبر فيه ببراءة عن حلمه في امتلاك بيت خاص بأسرته، وتوفير مستلزمات الدراسة، لتكشف كلماته عن معاناة حقيقية تعيشها أسرته.

يقول عبدالله: «كان نفسي يكون معانا بيت وفلوس عشان بابا يسدد الإيجار اللي عليه، ويبقى عندنا بيت ملكنا، أنا لسه ما بروحش المدرسة، هستنى لما نجيب لبس المدرسة.. بس لحد دلوقتي ما معناش فلوس نجيبه».

وعن رد فعل أسرته، علق طفل سوهاج قائلا: «بابا فرح بعد ما عملت الفيديو، وماما ما قالتليش حاجة، بس جارتي فرحت بيا قوي وقعدت تعيط وتحضني، وأنا حاولت أهديها، مشيرًا إلى أن تفاعل الناس أسعده جدا».

وتابع الطفل: «حاسس إني بقيت مشهور، عشان كل الناس اللي تقابلني تسلم عليا وتقول لي إيه يا عبدالله يا بطل.. وأنا مبسوط إني بقيت معروف والناس حبتني». وعن يومه العادي، قال عبدالله: أنا ما بلعبش كورة، بلعب مع أصحابي في الشارع خلاويص.. وأكتر حاجة بتسعدني إن بابا وماما حنينين عليا».