محمد الشرنوبي بعد غيابه عن الغناء 4 سنوات: كنت حاسس إني ضايع

كشف الفنان محمد الشرنوبي سبب غيابه 4 سنوات عن عالم الموسيقى والغناء، وعودته بألبومه الجديد.

قال محمد الشرنوبي عبر تصريحات تلفزيونية: «كنت حاسس إني ضايع ومش لاقي نفسي ومش عارف ألاقي حاجة تكون مختلفة محدش بيقدمها غيري ودا كان شاغلني».

وتابع: «ولما نبص على الأساطير اللي في التاريخ كان دايمًا عندهم هوية وحاجة بتميزهم عن غيرهم ولو حد قلدها هيقولوا دا بيقلد، كنت ضايع في الحتة دي وكل حد بيلاقي هويته لازم يبقى فاهم صناعة المزيكا وإزاي يصنع أغنية، عملت استديو صغير وابتديت أتعلم من الأول خالص إزاي أعمل أغنية وإزاي أطلع ميكس وماستر بطريقة معينة عشان أطلع صوت مختلف عن الموجود في السوق».

واستكمل محمد الشرنوبي: «الرحلة بدأت من 4 سنين قعدت قافل على نفسي وطلعت حوالي 250 تراك وكنت فاتح ورش كتير مع ناس كتير وكنت ببحث عن هويتي دا بكل بساطة اللي حصل في الأربع سنين وهويتي الجديدة هي هوية معاصرة بطابع شرقي بثقافة مصرية وعصرية جدًا شبه اللي بيحصل في السوق العالمي».

واختتم: «دا اللي وصلتله وأظن باين في الألبوم، أنا مزيكتي خفيفة جدًا بس في الآخر بغني وعندي ثقافة مصرية بعتز بيها جدًا».