محمد الشرنوبي يرد على صدمة جمهوره بسبب اللوك الجديد: اتزنقت في حتة المطرب الحبوب الخلوق

كشف الفنان محمد الشرنوبي سبب تخليه عن هويته القديمة في تقديم الأغاني، بألبومه الجديد في 2026، من الشعر الأشقر القصير، إلى ستايل الملابس والرقص.

قال محمد الشرنوبي عبر تصريحات تلفزيونية: «متفهم جدًا الخضة اللي عند الناس، بس يعني بطلب منهم يركزوا في المحتوى ده اللي خد وقت أطول ومجهود أكبر، فده اللي بجد مستاهل إنه يتسمع ويتقيم كويس».

وتابع: «فكرة إني عملت شعري أصفر وغيرت طريقة لبسي واجتهدت على إن أنا أعمل شكل جسمي كويس وكل الحاجات دي كانت جزء من الشغل اللي بشتغله على نفسي وجزء من الاكتشاف اللي بكتشفه لنفسي، وخسيت تقريبًا من أول رمضان لحد شهر 6 أو 7، خسيت مثلاً 13 - 14 كيلو، إزاي بقى أكل بقى وتمرين ونوم».

وفيما يخص ارتباطه في بداياته بصورة المطرب الكلاسيكي صاحب الإطلالات الأنيقة، علق قائلًا: «أنا في الأول اتزنقت في الحتة بتاعة المطرب الحبوب الخلوق المؤدب اللي بيلبس بدلة جميلة».

واستكمل محمد الشرنوبي: «والحقيقة إن ده مش أنا، يعني أنا في الآخر عايز أهزر وعايز ألعب وعايز أجرب حاجات جديدة وعايز أكتشف حاجات جديدة وفجأة بسبب الطريقة اللي كنت بغني بيها قبل كده الناس كانت فاكرة إن أنا عندي مثلاً 40، 45 سنة وبسبب التمثيل لأني عملت أدوار شوية كبيرة فكنت عايز بس أعمل حاجات شبه سني دلوقتي اللي هو 30 سنة، شاب في مقتبل عمره».

واختتم: «هبتدي أكون شاب عادي، مش عايز أكون بغني في الأوبرا ومش عايز أكون لابس بدلة وواقف قدام مايك ومش عارف أتحرك، مش عارف أخد راحتي ومش عارف أخد مساحتي وأنا مش بني آدم هادي يعني، أنا بني آدم بحب ألعب وبحب أهزر وبحب أنطلق، فكنت عايز أعمل مزيكا شبهي، مزيكا شبه شوية طاقتي وشبه شخصيتي».