من الإغلاق لهجوم السوشيال ميديا.. تفاصيل أزمة مشيرة إسماعيل بسبب عيادة بيطرية

أثارت الفنانة المعتزلة مشيرة إسماعيل ضجة واسعة وجدلًا كبيرًا خلال الساعات الماضية، بسبب أزمتها مع عيادة بيطرية في محل مسكنها.

القصة بدأت باستغاثة من الفنانة مشيرة إسماعيل بالمسؤولين، لغلق عيادة بيطرية في نفس العقار الذي تسكن به، موضحة أن العيادة يخرج منها رائحة كريهة.

استغاثة مشيرة إسماعيل من عيادة بيطرية

وردت الفنانة على الهجوم الذي تتعرض له على السوشيال ميديا، وقالت عبر تصريحات تلفزيونية، إنها تقطن في نفس العقار منذ أكثر من 42 عامًا، وفوجئت مؤخرًا بوجود مستشفى للكلاب في الطابق الأرضي.

قالت مشيرة إسماعيل: «اللي بيحصل لي كوارث.. لأنه فجأة واحد جه وحط عدة في الأرض الساعة 12 بالليل من سنة ونص كده تقريبًا وعلق يافطة إنه هيعمل مستشفى حيوانات وعلق إضاءة في واجهة العمارة ودخل وعمل بدون ما يستشير حد ولا أي حاجة، هو بيدعي إنه قابل رئيس اتحاد ملاك العمارة.. إحنا معندناش اتحاد ملاك في العمارة.. هو عندنا دكتور في العمارة يعني بيلم فلوس الماية والنور وكده وبيعتبر نفسه يعني مسؤول فهو قابله وقاله معندناش مانع مسألش السكان».

واستكملت: «فجأة لقيت الكلاب داخلة علينا من بابنا.. داخلة على المستشفى وخارجة من المستشفى والستات داخلة ولما تخلص أو تنتظر دورها تقعد على السلالم وتشرب السجاير وحاجة يعني رهيبة.. إحنا مأزيين الكلاب أول ما تدخل تتبول وتتبرز على السلالم وتطلع على الأدوار اللي إحنا فيها وتتبول وتتبرز أنا نازلة داخلة خارجة مع كلاب ومع بول وبراز بتاعة كلاب وكلاب مريضة وفيه كلاب داخلة ميتة متشالة على الأيدين».

وأضافت مشيرة إسماعيل: «العمارة سكنية وليست تجارية.. والمالك يغير الأنشطة، دي عمارة سكنية مش برج إداري ولا برج ولا مول، مالك الشقة هو اللي أجرها لهذا الدكتور البيطري اللي عملها مستشفى.. وكل شوية بيغيروا أنشطة وبيعملوا مشاريع تانية كتير، وقدمت البلاغ أنا اشتكي منذ أكثر من سنة ونص.. واشتكيت لأصحاب الشقة، الحي جه مرتين وكانوا هيضربوه ونزلوا 3 من السكان كانوا عاملين يهاجموه وهيضربوه، والحيوانات باتوا ليلة مقفولة والنهاردة جات لجنة فتحت وهم جوه زي ما هم، وراح صاحب العيادة أحضر ما يفيد بالتصالح أو ترخيص تجاري.. أنا عايشة 40 سنة في العمارة ألاقي نازلة مع الكلاب في العمارة»

أزمة مشيرة إسماعيل وصاحب عيادة بيطرية

وذلك بعدما استغاث أحمد النبراوي طبيب بيطري وأحد ملاك عيادة الحيوانات، وكتب في منشور عبر حسابه الشخصي بموقع فيس بوك: «إحنا قلنا للحي مينفعش تقفل عيادة بيطرية فيها حيوانات هتموت من الجوع، الرد كان مش مهم تموت أهم حاجة جارتكم الفنانة مشيرة إسماعيل متزعلش، وقفل العيادة على الحيوانات ومشي».

وبعد ساعات، أعلن أحمد النبراوي أحد مالكي العيادة البيطرية، إعادة فتح العيادة مرة أخرى، وكتب في منشور عبر حسابه الشخصي: «الحمد لله العيادة فتحت تاني.. شكرًا بجد لكل واحد ساعدنا، لكم كل التحية والاحترام، وأنقذنا الحيوانات والدكاترة».