منة بدر تيسير تنتقد ابنة علي الحجار: قسيتي على أبوكي قوي

علقت الفنانة منة بدر تيسير على أزمة الفنان علي الحجار وابنته، منتقدة تصرف بثينة علي الحجار.

كتبت منة بدر تيسير في منشور عبر حسابها الرسمي بموقع فيس بوك: «أنا رافضة تمامًا اللي بنت علي الحجار عملته أكيد عندها أسبابها اللي تعبها.. ربنا يفك كربها بس ولا أي مبرر يخليني أعذر هذا التصرف: عارفة يعني إيه أب.. عارفة يعني إيه أم.. عارفة يعني إيه أهل.. عارفة يعني إيه صلة رحم.. عارفة يعني إيه ستر.. عارفة يعني إيه العفو.. عارفة يعني إيه رحمة.. طب عارفة يعني إيه مسؤولية».

وتابعت: «ده الواحد يا بنتي ساعات بيشوف من ناس كان فكرهم أصحابه قلة أصل وحاجات واطية وبيسكت ومش بيفضح علشان العيش والملح لمجرد أنهم كانوا أصاحبهم في يوم من الأيام ما بالك بقا أبوه وأمه وأهله.. الأب والأم مفيش معاهم مجال للانتقام وتصفيته حسابات وعلى فكرة ربنا هيحاسبك على اللي إنتي عملتيه».

واستكملت منة بدر تيسير تعليقها على أزمة ابنة علي الحجار، قائلة: «عارفة يعني إيه بر الوالدين؟.. قال الله تعالى (وقضى ربك ألا تعبدوا إلا إياه وبالوالدين إحسانا إما يبلغن عندك الكبر أحدهما أو كلاهما فلا تقل لهما أف ولا تنهرهما وقل لهما قولا كريما واخفض لهما جناح الذل من الرحمة وقل رب ارحمهما كما ربياني صغيرا).. لو هو قصر في حقك مثلا ربنا هيحاسبه بس مش دورك إنك نتصبي محاكمة على أبوكي على السوشيال ميديا بالفضايح».

واختتمت: «وعلى فكرة إنتي عارفة إن الفيديو هينتشر بس إنتي فكرتي في نفسك وبس والفضايح وتريندات الإساءة بتنفع وبتجيب نتيجة بس نتيجة رخيصه قوي.. إنتي قسيتي على أبوكي قوي علشان شغل وشوية فلوس.. إن شاء الله ربنا يفك كربك ويرزقك ويغفرلك ويسامحك ويغفرلنا جميعًا».