القصة الكاملة لأزمة البلوجر سارة محمد وخطيبها مصطفى.. باع شقته ويريد الزواج منها

ياسمين حمادة 02 مارس 2023 | 02:30 صباحاً

رد مصطفى خطيب البلوجر سارة عن الاتهامات التي وجهت له بأنه تركها وتخلى عنها، بعد أن فقدت بصرها بسبب الحادث الذي تعرضا له.

رد مصطفى خطيب البلوجر سارة على الاتهامات

كشف مصطفى خطيب البلوجر سارة في رده على الاتهامات، حقيقة تخليه عنها وتركه لها وموقف أسرتها منه، بجانب أسرار وكواليس تسبق الحادث مع الإعلامية نهال طايل في برنامج تفاصيل المذاع على شاشة قناة «صدى البلد 2».

تصريحات مصطفى خطيب البلوجر سارة يرصدها موقع قناة صدى البلد، خلال السطور التالية:

تصريحات مصطفى خطيب البلوجر سارة

أنا متضايق ومظلوم وسمعت إني مروحتلهاش وإني ندل.

من يوم الحادثة بحاول أتواصل معاها وأهلها رافضين لكن روحت المستشفى تالت يوم قولتلها هتجوزك مهما حصل وده اختبار من ربنا وهنعدي ده مع بعض.

في أول يومين بعد الحادثة مقدرتش أروحلها بسبب تحريات الشرطة والنيابة، ووالدتها بتقولها مصطفى ندل مش هيجيلك ومش هيتجوز.

في البداية والدتها كانت رفضاني واستغلت الوقت ده عشان تكرهها فيا لأني شاب في بداية حياتي ومعتمد على نفسي لكن هي عايزالها شخص ماديًا كويس وكانت بتجيبلها عرسان من الكويت والخليج.

أنا وسارة بنحب بعض من أول ما عرفنا بعض من شهر 3 الماضي وهي جارتي ساكنة قدامي واتعرفنا على بعض ومن ساعة ما اتعرفنا وإحنا يوميًا مع بعض، هي أكتر حاجة بحبها فيها إنها صريحة جدًا مع أهلها ومع الكل، وبتتكلم في الصح دايمًا.

حادث البلوجر سارة وخطيبها

كنا خارجين وإحنا راجعين على الصحراوي بعد كوبري أبو الخير، داخت ووقفنا على جنب بتشرب ماية ولقيتها بتبص على شمالي وتقولي خلي بالك وبتصوت ولقيت واحد ببندقية وراح ضارب بعدها اتحركت على أقرب بنزينة، واستنجدت بالناس وكلمت صحابي وأهلي وروحنا على مستشفى العامرية.

ركبت معاها سيارة الإسعاف وقولتها مش هسيبك وأنا جنبك، والناس اللي اتعرضولنا كانوا عايزين يسرقوا العربية وفيه محاضر ضدهم كتير وتخصصهم سرقة عربيات، ولما شوفتها صعبت عليا لأن هي نفسي وملحقتش أفاديها وأهلها شاكين إن الناس اللي ضربونا في عداء بيني وبينهم وإني السبب في اللي حصلها.

كنا مخطوبين وحصل انفصال بعد 3 شهور بسبب مشاكل الأهل.

والدتها بتحطنا في مشاكل دايمًا، وبعرف أخبارها دايمًا من المقربين لها والسوشيال ميديا وصحابها.

سارة أكتر حاجة وجعاها إني مش جنبها وكل فترة أهلها بيكرهوهها فيا، وأنا كان ممكن أموت في ساعتها لأن الخرطوش كان ناحيتي.

والد سارة طلب مننا أكتب عليها قبل ما أشوفها وأتطمن عليها.. الكلام ده بعدما خرجت من المستشفى بيومين.

فيه أمل تشوف بعين واحدة لأنها أصيبت بشكل كبير في العين الأخرى، واللي جاي مش هسيبها وهفضل جنبها لحد ما نبقى مع بعض في بيت واحد، ولو رفضت سارة دلوقتي هيكون بسبب الضغط اللي عليها واللي حصل مش بإرادتها.

أنا مش شايف إني قصرت في حاجة كان هدفي أتطمن على سارة، ووالدتها كانت بتقول لصحابها قولوا لسارة إن مصطفى ندل وعايش حياته ونسيكي وشايف إن الحادث قضاء وقدر محدش يقدر يعترض.

لحد دلوقتي أنا مقعدتش معاها ومش هسمع حاجة غير من سارة حتى لو كل الناس اتكلمت ووالدها بينكر إني كنت في القسم وبحاول أجيب حق سارة.

إنتي عارفة إن والدتك مش بتحبني ونفسها إننا نبعد عن بعض، وأنا هتجوزك ومش هسيبك إلا لما تكوني كويسة ويمكن ربنا فداني عشان أفضل جنبك.

والدتها قالت لوالدتي هعمل مجزرة لو جيتوا ونفسيتي وكرامتي مش هتخليني أقبل ده، عشان كدة مش عايز أكلم أهلها.

أنا بيعت شقتي لقدر الله لو احتجنا فلوس عشانها أو لعلاجها.

تصريحات والدة مصطفى خطيب البلوجر سارة

منظر صعب ربنا ميكتبوش على حد، وأغمى عليّ في المستشفى.

الحمدلله ربنا نجا ابني وسارة بنتي اللي أنا مخلفتهاش، ولما كلمت والدتها قالتلي لو جيتي هنعمل مجزرة.

كل أسرار سارة كانت معايا أنا وبتحبني أكتر من والدتها وهي كانت بتغير مني لهذا السبب وأنا حاسة إننا في حرب مش خطوبة.

عايزين نشوف سارة لكن مش عايزين نعمل مشاكل عشان نفسيتها وبدعيلها من كل قلبي ربنا يشفيها وترجع تشوف.

من هي البلوجر سارة محمد ؟

أصبحت البلوجر سارة محمد حديث السوشيال ميديا حيث أطلق تشكيل عصابى النار عليها أثناء سيرها مع خطيبها بالسيارة في طريق الإسكندرية الصحراوي.

وأصيبت البلوجر سارة محمد بالعمى بسبب شظايا العيار الناري والزجاج المهشم الذي ارتطم بوجهها، ويرصد موقع قناة صدي البلد أهم المعلومات عن البلوجر سارة محمد، بعد أن تصدر اسمها منصات مواقع التواصل الاجتماعي:

البلوجر سارة محمد، من محافظة الإسكندرية.

مهتمة بمجال الموضة والأزياء.

الحادث المروع الذي تعرضت له وقع الخميس الماضي 10 مساء.

فقدت بصرها جراء الحادث.

لديها 120 ألف متابع عبر منصة إنستجرام.

مأساة البلوجر سارة

ظهرت البلوجر سارة محمد صاحبة الـ21 عام بعد الحادث عبر فيديوهات تناقلتها مواقع التواصل الاجتماعى وهى تروي المأساة التى تعرضت لها، على يد بعض المجهولين، حيث كانت في نزهة مع خطيبها وتسير معه بالشارع بمنطقة محطة الرمل بمحافظة الإسكندرية.

انتهت البلوجر سارة محمد من قضاء احتياجتها وانطلقت بصحبة خطيبها ليستقلا السيارة ويذهبا إلى المنزل القريب من طريق إسكندرية الصحراوى، وأثناء سيرهما بالسيارة اعترض طريقهما مجهولين حاملين الأسلحة.

وأطلقوا عليهم الخرطوش لتصيبها فى عينيها وراسها، تجمع المارة بعد فترة من الوقت حول البلوجر سارة وطلبوا الإسعاف، وبعد نقلها إلى المستشفى دخلت غرفة العمليات نتيجة إصابتها بنزيف فى المخ وتهتك في الشبكية والقرنية، إثر دخول الخرطوش فى عينها الشمال واليمين، لتفاجأ سارة بعد خروجها بفقدانها البصر.

تصريحات البلوجر سارة

وظلت البلوجر سارة لمدة 3 أيام تعاني من النزيف والقيء المستمر، وتدهورت حالتها النفسية بعد تشوهات رأسها ووجها.

حالة من الحزن سيطرت على أهل البلوجر سارة، فوالدها روى تفاصيل ماسمعه عن الحادث، حيث أكد والدها أن الجناه كانوا يريدون السرقة ، وتسببوا فى ضياع مستقبل ابنته، مضيفًا أنها منهارة من وقت الحادث، وطالب بتوقيع أقصى العقوبة عليهم.

المثير للجدل أن خطيبها الذى اختارته بعد قصة حب استمرت لسنوات تركها، ولم يطمأن عليها إلا مرة واحدة ومن بعدها انقطع انها حتى بالاتصال ، وهو مازاد الوضع سوء، لتخليه عنها، وفق ما روته سارة في تصريحات تلفزيونية.

وتمكنت أجهزة الأمن بوزارة الداخلية، من ضبط المتهمين بعد ساعات من الحادث، حيث كانوا يستقلون سيارة ربع نقل، واعترفوا أنهم كان هدفهم السرقة.

حالة البلوجر سارة الصحية

كشفت فاطمة، خالة البلوجر سارة محمد، تفاصيل إصابة البلوجر سارة بطلقة نارية عقب عودتهم من الإسكندرية، وذلك بعد هجوم مجموعة من الأشخاص عليهم، وإصابتها بفقدان نظر، وتشويه وجهها بصورة كاملة.

وأضافت خالة البلوجر أن تعاني من أزمة نفسية حادة، وغير متقبلة للوضع الحالي، حيث الأطباء غير قادرين على تشخيص إصابة عينها بشكل دقيق، بجانب خوفها من إجراء العملية قد تؤدي لتسبب فقدان عمى نهائي.

وناشدت خالة البلوجر سارة، الجهات المعينة من أجل تقديم المساعدة لهم، وتشخيص حالة سارة بشكل جيد، وإجراء العملية اللازمة حتى لا يتم فقدان نظرها بصورة نهائية.