دوللي شاهين: تعرضت لقهر الأب وحاولت أنهي حياتي

ياسمين حمادة 10 يونية 2023 | 03:44 مساءً

كشفت الفنانة دوللي شاهين أسرار عن حياتها الشخصية والفنية لأول مرة، أثارت بها ضجة واسعة خلال الساعات الماضية، بجانب موقفها من دخول ابنتها مجال الفن.

ابنة دوللي شاهين

حقيقة دخول ابنة دوللي شاهين مجال الفن، قالت الفنانة في تصريحات تلفزيونية لها: «أنا ست عقلانية ومقدرش أمنع بنتي عن حاجة محدش قدر يمنعني منها وموقفي هو دعم بنتي في أي حاجة هي عايزاها، لكن محبش تدخل الوسط الفني لأنه عذاب وشقاء، ومفيش عندها حد يدعمها زي ما أنا لوحدي ومفيش حد يدعمني وساعات كتير بنقعد من غير شغل علشان الشللية في الوسط».

وتحدثت عن طفولتها قائلة: «رغم كل جبروت بابا حاولت أنتحر مرات، ويا إما أموت أو أحدد مستقبلي زي ما أنا عايزاه، أنا كائن عنده حرية الاختيار وطفولتي مكنتش لطيفة لدرجة كبيرة، واللي فكراه إني في سن مُعين كنت عاملة زي الولد وبتعامل زي الولد وشقية جدًا، وعلاقتي بوالدي ماكنتش كويسة ولكن والدتي كانت ملاك».

ابنة دوللي شاهين

علاقة دوللي شاهين ووالدها

وعن علاقة دوللي شاهين ووالدها قالت: «بابا أثر فيّ أكتر من ماما لأن شخصيته قوية جدًا وراجل شرقي بزيادة وكان عنده قيود كتيرة وكان كل أحلامي إني أتحرر من قيوده، قبل ما أفكر مين فتى أحلامي وأفتكرله موقف، كان أول جيبة ألبسها في حياتي جاتلي هدية وأنا عندي 13 سنة، فقطعهالي علشان يقهرني ويضايقني، ومن وقتها وأنا بقى كل هدفي إني أتحرر من عقليته المتخلفة دي».

واستكملت الفنانة اللبنانية قائلة: «هو كان شايف إني مش حلوة ودايمًا بقول البني آدم اللي عنده مشاكل بتكون من الطفولة وممكن والدي كان كده، أكيد هو مش بيكرهني ولكن كان بيخاف عليا بطريقة خلته قفل عليا بزيادة».

تصريحات دوللي شاهين

وعن فارق العمر بين الزوجين قالت: «المنطقي الراجل يكون أكبر من مراته بفرق بسيط لغاية أربع سنين مثلًا، علشان الست عادة بتنضج أسرع من الرجل، بحكم تربيتنا الشرقية وإن البنت بتتحمل مسئولية البيت وإخواتها».

واستكملت قائلة: «بعيش دلوقتي قصة حب، والحب حاجة جميلة ولكن اللي يقدر قيمة الحب، إحنا بنسعى طول الوقت للحب الحقيقي ولما بنلاقيه مش بنتعامل معاه صح، وأنا بؤمن بالحب الزيادة وأن الحب أهم من أي حاجة في الدنيا، ولغاية دلوقتي مقتنعة أن لسة في أمل في الحب».

واختتمت حديثها بتعليقها عن مصطلح السينما النظيفة قائلة: «مفيش حاجة اسمها سينما نظيفة، مفيش أنضف من سعاد حسني وهند رستم ومش هييجي أشطر منهم، وياريت كنت اتولدت في الزمن الجميل ده».

دوللي شاهين