عمر عبد العزيز يطالب ورثة الفنانين بتسليم مقتنيات ذويهم لمتحف السينما بدلًا من بيعها

وجه المخرج عمر عبد العزيز نداءً لأبناء وورثة الفنانين بضرورة تسليم مقتنيات ذويهم لمتحف السينما بدلًا من بيعها، معبرًا عن استيائه من ظاهرة التفريط في تراث رموز الفن المصري.

وقال عبد العزيز في تصريحات تلفزيونية: "إحنا بنحاول نقول للأبناء اللي عنده حاجة يجيبها، علشان نقدر نعمل أرشيف حقيقي يوثق تاريخ الفن المصري. في مهرجان الجونة مثلاً، في أفلام اترممت لأن الحكومة كانت مالكاها، لكن في حاجات تانية لسه في البيوت عند الورثة ومحدش يعرف عنها حاجة. الفنان نور الشريف مثلًا تبرع بكل مقتنياته لمكتبة الإسكندرية، وده الوعي اللي محتاجين نوصله".

وأضاف: "دلوقتي بنعمل متحف السينما في مدينة السينما، وأنا بناشد أي حد عنده مقتنيات فنية يتواصل معانا في اتحاد النقابات الفنية الثلاثة أو نقابة السينمائيين، علشان نحافظ على التراث ده ونحطه في المتحف".

كما كشف عبد العزيز عن واقعة مؤسفة تخص مكتبة المخرج الراحل أحمد كامل مرسي، قائلًا: "كان عنده مكتبة غير طبيعية، لكن للأسف اتباعت على الأرصفة لأنه ماكانش عنده ورثة".

وفي سياق آخر، تحدث المخرج عمر عبد العزيز عن إصابته بكسر في الكاحل، موضحًا أنه سقط داخل الحمام مما تسبب في الكسر، وقال: "الحمد لله، قالولي الأسبوع الجاي هفك الجبس، وإن شاء الله أرجع لحركتي الطبيعية قريب".