محامية أسماء جلال: أصيبت بصدمة وتطالب بالاعتذار وحذف حلقتها مع رامز جلال

تحدثت نهاد أبو القمصان محامية الفنانة أسماء جلال، عن تفاصيل مقاضاة الفنان رامز جلال بعد حلقة موكلتها في برنامج رامز ليفل الوحش.

قالت نهاد أبو القمصان عبر تصريحات تلفزيونية: «إحنا مش ضد أي برنامج ترفيهي.. أسماء كانت عارفة أن ده برنامج ترفيهي وعارفة أنه مع البرنامج ده تحديدًا هيبقى فيه مفاجآت، وهي في الأساس كان عندها بعض التحفظات وتم وعدها أنه هيتم الاحترام للتحفظات دي».

تفاصيل مقاضاة أسماء جلال لرامز جلال

وتابعت: «وعشان كدا وافقت على المشاركة، كانت تحفظاتها عدم استخدام الألفاظ الخارجة أو الإيحاءات اللي معروف بيها البرنامج لأن هي شاركت فيه قبل كدة، ومكانتش عايزة تشارك تاني لكن وُعدت أن كل ما سيزعجها مش هيحصل، وعكس ده اللي حصل هي شافت جرعة مكثفة أثناء تصوير البرنامج من كل اللي تحفظت عليه وحاولت أكثر من مرة تقولهم وقفوا التصوير».

واستكملت نهاد أبو القمصان محامية أسماء جلال: «واتقالها أن الحاجات اللي أزعجتك في التصوير هنشيلها في المونتاج، وفي أول يوم فوجئت بمقدمة فيها قدر هائل من التنمر والإهانة ووصفها بوصف لا يليق ويشكل طبقًا للقانون المصري عدد من الجرائم، كمان زوايا التصوير نفسه كلها فيها تحفظ شديد وهي بترفض الطريقة دي في التصوير».

تصريحات نهاد أبو القمصان عن أزمة أسماء جلال

وأضافت: «أسماء جلال أصيبت بصدمة شديدة لمدة يوم أو يومين وهي بتحاول تستجمع قواها وتتناقش حوالين الموقف القانوني وبناءً عليه أعلنا البيان، وإحنا عندنا مطلب واضح وهو اعتذار رامز جلال ليها بشكل واضح عما حدث في البرنامج وأنه يتشال من على المنصات».

واختتمت محامية أسماء جلال: «عندنا مطلب واضح هو اعتذار رامز جلال ليها وانه يتشال من على المنصات، وإحنا منقدرش دلوقتي نطالب بعدم عرض الحلقة لأن هي اتعرضت خلاص وموجودة على المنصات، وفيه فرق بين الهزار والمقالب وأني استخدم ألفاظ تصل للجرائم أبسطها التنمر، ولا يوجد في العقد أنها توافق على المقدمة ولم يعرض عليها اسكريبت ما سيقال، وحتى الآن لم نتواصل مع رامز جلال أو أحد من فريقه».