نادر أبو الليف عن أزمة الميراث مع شقيقه: هتقول لربنا كنت عايز تقتل أخوك علشان تورثه

أثار الفنان نادر أبو الليف ضجة واسعة وجدلًا كبيرًا، بسبب استغاثته من أزمة الميراث مع شقيقه.

كتب نادر أبو الليف في منشور عبر حسابه الشخصي بموقع فيس بوك: «عايز أعرف ليه الناس ضمايرها ونفوسها وأخلاقها وتربيتها اتغيرت من جواها.. كل واحد بقي يهمه نفسه فقط لاغير ومش مهم أي حد على وجه الأرض كله بيقول يا نفسي وطوز في الآخرين حتى للأسف الشديد أخوك ابن أمك وأبوك اللي نازل أنت وهو من رحم واحد ومتربيين في بيت واحد عايز ياكلك ويدوس عليك وياكل ورثك ليه خلاص مبقاش في ضمير ونخوة ورجولة ودين ومباديء وأخلاق ومراعاة للدم اللي بينك وبينه».

واستكمل: «ياناس قسمًا بالله الكفن مالهوش جيوب وهتنزل التربة مش معاك غير عملك مش هتاخد حاجة معاك فكر كدا لما تقابل رب كريم هتقوله إيه هتقوله إنك كنت عايز تقتل أخوك علشان تورثه ولا هتقوله كنت عايز تاخد ورثه علشان أنت ظالم ومفتري وحقودي وجواك حقد وغل وكره لأخوك وللكون كله».

وأضاف نادر أبو الليف: «هو حصل إيه في الدنيا ياناس نفسي أعرف وللأسف معاه محامي حسبي الله ونعم الوكيل فيه كل لما نرفع قضية يروح رايح المحكمة ويحفظها بطرق وبأساليب ملتوية بقالي أكتر من عشر سنين دايخين في المحاكم علشان نبيع شقة ورث وكل واحد ياخد نصيبه بما يرضي الله وللأسف المحاكم والقضايا اللي زي دي بتاخد سنين طويلة».

وقال أيضًا: «نفسي يفوق ويحس ويعرف إننا إخوات وعمر الدم مايبقى ماية لكن هو للأسف الشديد ولابيفكر ولايهمه ولاشايف ولا سامع غير نفسه ومصلحته وطوز في أي حد ولو تتخذت أي شيء معاه للأسف الإعلام والصحافة مش هيسبوني وهبقي محتوى للخوض فيا ومتكتف ومش عارف أتصرف إزاي وأعمل إيه».

واختتم: «وأتمنى أتمنى أتمنى أي مسؤول أو أي حد يرد عليا بحل سريع ينهي موضوع الورث اللي هو حقي ومش عارف أخده من أخويا وربنا يهديه لنفسه ويتقي ربنا ويعطي كل واحد حقه بما يرضي الله أتمنى الرد ولكم جزيل الشكر.. نداء إلي كل من يهمه الأمر من الجهات المعنية وكل عيد وأنتم بخير».