أحمد موسى يرد على هجوم الإعلام العبري: هفضل أفضح جرائمكم.. فيديو

شن الإعلامي هجومًا على وسائل الإعلام الإسرائيلية، مؤكدًا رفضه اتهامه بـ معاداة السامية، ومشددًا على احترام جميع الأديان، مع توجيه انتقادات قوية للسياسات الإسرائيلية في غزة ولبنان.

وقال الإعلامي أحمد موسى، خلال تقديم برنامج 'على مسئوليتي' المذاع على قناة صدى البلد: 'الإعلام العبري زعلانين، يزعلوا يتفلقوا، زعلانين من كلامي ضدهم، طيب أنا معاك؟ أنا ضدك، هتخوفني لما تقول أنا بعادي السامية، أنا بحترم كل الأديان ولا نعاديها على الإطلاق'.

وأضاف: 'وعملوا تقارير نشرت في القناة الـ14 الإسرائيلية بيطالبوا بالرد على الإعلام المصري، وإن الإعلام المصري بينتهك معاهدة السلام'.

وأوضح: 'ده انتوا لحد النهارده بتقتلوا في غزة ولبنان، إسرائيل بتنتهك طول الوقت ولم يحترموا اتفاق حتى الآن، وبيحصل انتهاك على لبنان وغزة، وزعلانين لما بقول على نتنياهو مجرم حرب، أيوة مجرم حرب، عمل مجازر، وبيستخدموا هذا المصطلح لإرهاب الناس، والهدف تخويف الناس، وبيستخدموا هذا الأمر عشان محدش يتكلم عليهم وعن جرائمهم'.

وتابع: 'إحنا عندنا سلام وعندنا معاهدة، ونحترم المعاهدة والسلام، لكن أنت عايز يكون عندك مخططات معادية لكل الدول، مسمعتش من نتنياهو كلمة سلام، وأجهزتكم تتحدث عن الأطماع، وسأظل أفضح جرائم مجرم الحرب نتنياهو في غزة ولبنان، الأرض اللي أنت عليها دي أرض فلسطين مش أرضك، وهيجي يوم من الأيام والناس دي ترجع لأرضها، ده انتو طول الوقت بتقولوا مفيش دولة فلسطينية، بتعادي كده العالم الحر كله، بتعادي 164 دولة مع قيام دولة فلسطينية'.

وأوضح: 'نتنياهو مش عايز ينفذ السلام وبيعتدي على لبنان ويقتل الشعب اللبناني الشقيق، كل ده جرائم حرب، بيرتكبها مجرم الحرب نتنياهو، والمحكمة الدولية طالبة نتنياهو في العدالة في كل مكان لأنه بيرتكب جرائم حرب، ولما تقوم النهارده بالإجراءات دي حد هيسيبك؟ لا طبعًا، ومش هتخفونا بتهمة جاهزة وهي معاداة السامية، وبتستخدموا هذا المصطلح عشان تضغطوا على الدول والشعوب'.

واختتم: 'الفنان عادل إمام لما عمل فرقة ناجي عطالله، والسفارة في العمارة اتهمتوه بمعاداة السامية، لكن لا أحد يعادي السامية، واتهمتوا اللاعب لامين يامال وإحنا ضد هذا الكيان'.