بدرية طلبة تكشف سر نشرها محادثة بينها وبين قناة إسرائيلية.. أنغام السبب

ردت الفنانة بدرية طلبة على الانتقادات التي تعرضت لها والمشككين لرسالتها مع إحدى القنوات الفضائية، من خلال بث مباشر عبر حسابها الرسمي بموقع انستجرام.

قالت بدرية طلبة في الفيديو: «أنا قاعدة في أمان الله لاقيت على الواتساب الرقم ومش واخدة بالي مين اللي بيكلمني ولا في إيه، معرفتش الرقم ده منين إلا بعدها بيوم أو يومين، واحدة زي ما أنتوا شايفين في الشات بتقولي أنهم عايزيني في حفلة».

تصريحات بدرية طلبة

وتابعت: «رديت وقولت أشوف للآخر يمكن حد عامل مقلب، أنا رديت باللي يمليه عليا ضميري من ناحية الناس دول ومن ناحية بلدي، يعني أنا ست وطنية ومحدش يشكك في ده نهائي.. يعني الحمدلله مش محتاجة أني أطبل لبلدي لأن دي بلدي اللي عايشة فيها واللي محمية فيها وبمثل اسمها في أي دولة بروح فيها.. على فكرة اللي أنا عملته ده غلط عليا أني أنزل شات لأن أنا بسافر دول ببقى ماشية ممكن جنبي حد إسرائيلي».

واستكملت الفنانة بدرية طلبة: «أنا محتفظة بالشات من شهر 3، وكاتبة لي الحفلة 25 إبريل 2023، أنا منزلة الشات لسبب بعد 7 شهور لما لاقيتهم بيتطاولوا على الأستاذة الفنانة الميجا ستار صوت مصر أنغام، وأنتوا بتتطاولوا عليها وبتهددوها وبتقولوا لها إحنا هنبيدكم زي ما أبادنا الفلسطينيين».

تفاصيل مكالمة بدرية طلبة وقناة إسرائيلية

وأضافت: «أنتوا عيب عليكم أنكم تدخلوا برقمكم تكلموا فنانة مصرية وتديكم على دماغكم وهو ده المقصود، ماشية بمبدأ أنا وأخويا على ابن عمي وأنا وابن عمي على الغريب.. أنا لا محمد صلاح والنبي أطلع قولي إيه ولا محمد رمضان اللي بقى تبارك الله عالمي هو ومحمد صلاح، أنا ممثلة مصرية حصل معايا موقف لاقيت زميلة كبيرة مينفعش أن حد يدخل يتطاول عليها من الأشكال بتاعتهم».

واستكملت الفنانة بدرية طلبة: «فدخلت وقولت لهم لأ عندكم أنتوا بتكلموا الأستاذة وهي فعلًا الأستاذة حتى لو هي أصغر مني في السن هي أستاذة وميجا ستار وكبيرة أوي وكلنا بنفتخر بها.. أنتوا داخلين تقولوا لها كده طيب تعالوا ليا كده أنا ممثلة على قدي طلبتوني أني أروح عندكم حتى لو بيشتغلوني وأنا شتمتكم يعني حاولت أوريهم أن أنتوا ولا حاجة.. وأنا اللي عملت لها بلوك بعد ما ظبطتها، وبعدين ده لو متفبرك أنا مش هطلع نفسي على المسرح قدامكم».

بدرية طلبة

بدرية طلبة في بث مباشر

وقالت أيضًا: «يعني ما شاء الله لما باسم طلع ظبطهم كنا مبسوطين وأنا أول واحدة على صفحتي نزلت الحوار بتاعه، واللي يقدر على حاجة يعملها لو عيل صغير رفع علم فلسطين ده إحنا نفرح به ونشجعه.. أنتوا جايين لواحدة عادي جدًا يحصل معها ده تتطلب في حفلة وترفضها تشككوا عادي شككوا».

واختتمت الفنانة بدرية طلبة قائلة: «لا تعالى ياللي بتتفذلك على فنانة اللي يوم ما تشوفها تطلب منها صورة ممكن تقولك لا مش فاضية، دي الأستاذة أنغام مينفعش تكلمها كده، عشان أنا معلمة عليكم أنتوا عايزين فنانين مصر يتعاملوا معاكم إزاي بتتمنوا يسلموا عليكم، وفي العالم كله في الدول الأجنبية والجاليات المصرية بتحبني ونفسهم يشوفوني وأروح لهم، ووارد جدًا أروح مكان من ده ويكون واقف جنبي واحد إسرائيلي ويعمل معايا أي موقف مش حلو، يعني أنا عرضت نفسي لخطر».

 

View this post on Instagram

 

A post shared by Badria Tolba بدرية طلبة (@badriatolbaofficial)