بشتغل خدامة في البيوت.. سيدة تنهار بعد وقف معاش زوجها: ادعولي ربنا يقويني ومحدش يتنمر عليا

كشفت أم أميرة، زوجة أحد الأشخاص من ذوي الهمم، عن معاناتها بعد وقف معاش زوجها، مؤكدة أنها اضطرت للعمل في البيوت لتوفير احتياجات أسرتها، رغم صعوبة ظروفها وخوفها على زوجها من تركه بمفرده.

وأضافت أم أميرة خلال لقائها مع الإعلامية نهال طايل ببرنامج "تفاصيل"، والمذاع على قناة صدى البلد، أنها تعمل في تنظيف المنازل وغسل السجاد والبطاطين، بالإضافة إلى أعمال الطبخ، قائلة: "بشتغل، وبغسل في البيوت، وبغسل سجاد وبطاطين، وبطبخ كمان، أنا مستعيبة أقول إني بشتغل خدامة في البيوت، لكن مضطرة".

وتابعت: "أنا مقدرش أسيب جوزي، بخاف أسيبه وأخرج من الصبح الساعة 7 وأرجع المغرب، وأسيبه يكون في مكان يحصل له حاجة، لو الست اللي مشغلاني ادتني فلوس الدنيا كلها، هتسوى إيه لما أرجع ألاقي جوزي ميت؟ لكن لو معايا معاشي مش هحتاج حد، كنت بجيب من الدكان والصيدلية وكل مكان احتياجات البيت، والحمد لله كنت ماشية حالي".

وأشارت إلى أنها لم تكن تعلم تفاصيل ما حدث بشأن السيارة التي حصل عليها زوجها، قائلة: "أنا جوزي غلبان، بياخدوه ويودوه ويجيبوه، أنا لا شفت عربية، ولا شفتها وهي بتتسلم، ولا شفت حاجة، واتفاجئت إنهم قالوا لي تعالي معانا عشان تتنازل عن العربية".

وعن أبنائها، قالت: "أولادي كويسين، أبوهم محفظهم أربعة أجزاء في القرآن، ما شاء الله عليهم، عمرهم ما تعبوني ولا صدعوني، بس زي أي أب، الأولاد بيطلبوا منه، يقولوا له يا بابا معاك خمسة جنيه؟ وأنا عارفة إن جوزي معهوش، لكن هو زي أي أب نفسه يديهم".

وتابعت: "كل العيال نفسها يبقى ليها أب يديها، وأنا لو معايا فلوس كنت هديهاله وأقوله حطهم في جيبك، لما بنتك تدخل عليك وتطلب منك حاجة تكون قادر تديها، وأنا راضية بقضاء ربنا وراضية باللي ربنا عطاهولي، هو إنسان عظيم وكل حاجة عندي في الدنيا، لكن برضه كل عياله نفسها يبقى ليها أب يسندها".

وأضافت: "أنا مرة دخلت بعيط بسبب كلمة قالها لي، قالي: اللي بينقطع من عند العبد مش هيقطع من عند ربنا، واللي بيرزق هو رب العباد، والكلام الحلو ده هو اللي بيخليني أكمل، وكنت محتاجة أعمل عملية ومكنش معايا فلوس، وربنا سخر لي ناس تساعدني، جابوا لي العلاج، وحتى لما كان ناقصني سرنجة جابوهالي، ربنا يجازيهم كل خير".

واختتمت أم أميرة حديثها قائلة: "أنا بناشد أهل الخير، أي حد يشوفني يدعيلي بالصبر والرحمة، ويدعي لجوزي بالرزق ولعيالي أنا مش عايزة حاجة تانية من الدنيا".