تفاصيل صادمة في جريمة العبور: قتل مراته ودفنها في الصحراء ورجع يتصفح التيك توك.. فيديو

كشفت والدة هبة، ضحية غدر زوجها في العبور، تفاصيل مأساوية في واقعة مقتل ابنتها، مؤكدة أن الجريمة هزت الأسرة بالكامل، بعدما تحولت علاقة زوجية استمرت سنوات إلى نهاية مأساوية صادمة.

وقالت خلال لقائها مع الإعلامية 'نهال طايل' في برنامج'تفاصيل' المذاع على قناة 'صدى البلد2'  'يوم السبت اللي هي اختفت فيه، اتصلت بنتها الساعة 5  المغرب، كنت غسلت وكنت قاعدة تعبانة، بتقولي يا تيتة ماما مجاتش عندك النهاردة؟ ماما عندكم؟ قلتلها اللي هيجيب مامتك هنا دلوقتي يا ندى؟ مامتك عندكم لما بتيجي بتستأذن من بابا وتجيبكم وتيجي، مشفتهاش أنا النهاردة، ليه هي مش في البيت ولا إيه؟ قالتلي أصلها خرجت مع بابا الصبح الساعة 10 الصبح من ساعتها مارجعتش، قلتلها خرجت هي ومين؟ قالتلي هي وبابا بس، قلتلها مخدتش حد من الصبيان معاها، قالتلي لا يا تيتة، ساعتها حسيت بغرزة سكينة انغرزت في صدري كدة'.

وأضافت: 'كان فيه مشاكل  بينهم بس مشاكل عادية زي اللي بيحصل في أي بيت، رجع الساعة 4 ونص، وقال أنا نزلتها عند المستوصف كانت بطنها وجعاها، وهي عمرها ما اشتكت من بطنها'.

وأكملت: 'نزلها وسابها، هو روايته بتقول أنا نزلتها وسبتها، دي رواية أولى، والرواية التانية بقوا يلفوا معاه بالعربية ساعة ما قبضوا عليه،  وكان رايح يعمل فينا محضر إن إحنا اللي مدرايينها عنه'.

وأضافت: 'هي قعدت الأسبوع اللي قبل الأخير معايا في رمضان كانت جاية زعلانة، بقولها ليه يا هبة في إيه، تقولي يا ماما إحنا في رمضان وضغط كتير علي ومش يسكت طيب يسيبها تطبخ وتعمل حاجتها لا، شتيمة وتهزيق.'

وتابعت: '18 سنة، مطمرش فيه العيش والملح اللي كانوا من إيدينا، مطمرش فيه، معملتلوش حاجة حلوة يفتكرها، تهون عليه؟ هي تهون عليه؟ مبصش للأربع عيال اللي عنده'.

وأضافت: ' قالها تعالي معايا هنروح نعزي، نازلة لابسة الطرحة السمرة والعباية السمرة والهدوم اللي تحت العباية سمرة، أسود في أسود بردو، وفي الصحراء، عند نفق الأوسطي، في العبور هنا في العبور الجديدة، الفاصل بين عبور اتنين وعبور تلاتة، راح قتلها ودفنها هناك في الصحراء'.

واختتمت: 'بعد ما قال إنه دور عليها في المستشفيات وجي اتشطف ودخل جوة على السرير، دخل يقعد يتصفح التيك توك وعمال يضحك'.