جابت 4% بعد ما كانت من الأوائل.. طالبة ثانوية عامة بالبحيرة تزعم تغيير نتيجتها

كشفت الطالبة ريم محمد أحمد، طالبة الثانوية العامة بمحافظة البحيرة، تفاصيل حصولها على نتيجة غير متوقعة في امتحانات الثانوية العامة، مؤكدة أنها فوجئت بظهور مجموعها بنسبة 4% فقط، رغم أنها كانت من الطالبات المتفوقات طوال سنوات الدراسة.

وأضافت ريم محمد أحمد خلال مداخلة هاتفية مع نهال طايل ببرنامج "تفاصيل"، والمذاع على قناة صدى البلد2، أنها فوجئت بظهور نتيجتها بمجموع 15 درجة من 320، أي بنسبة 4%، بعد أن كانت تتوقع الحصول على مجموع مرتفع نظرًا لمستواها الدراسي طوال العام.

وقالت ريم: "أنا مش عارفة إزاي ده اللي حصل، أنا كنت متوقعة نتيجة مختلفة تمامًا، لكن لما دخلت على الموقع ظهر لي في البداية مجموع 92.4 من 100، ودا رابط صحباتي بعتوا ليا أول ما دخلت على الموقع ظهرت اسم والمجموع وعمل ريستارت وخرج، ولما حاولت أدخل مرة تانية مفتحتش معايا".

وأضافت: "دخلت على مواقع كتير زي اليوم السابع وغيره، لكن مفيش حاجة فتحت معايا، لحد ما أصحابي وقرايبي قالولي إن النتيجة ظهرت وقالوا ليا أنا جايبة 15 من 320 يعني 4%، وده شيء مش طبيعي، ودا مستحيل يكون مستويا".

وأوضحت ريم أنها كانت من الطالبات المتفوقات في الشهادة الإعدادية، قائلة: "أنا كنت الأولى في الترم الأول في 3 إعدادي، وجبت 138 من 142، وفي الترم الثاني جبت 172.5، يعني كنت الرابعة على الدفعة بتاعتي".

وعن نتائج زملائها، قالت: "كل زمايلي الحمد لله جايبين مجاميع كويسة ومستواهم كويس جدًا، لكن النسبة للنتيجة بتاعتي أنا مسمعتش عنها قبل كده، أقل حاجة كنت بسمعها كانت 50% أو 40%، لكن 4% دي حاجة محصلتش خالص".

وأضافت: "ماما وبابا طبعًا منهارين، لأنهم كانوا شايفين تعبي طول السنة ومذاكرتي واجتهادي، وإحنا لسه بنتواصل وهنروح الإدارة وهنكلم المدرسين، وهنعمل تظلمات وكل الإجراءات اللازمة".

وأشارت إلى استغرابها من بعض درجات المواد، موضحة: "في الدنيا كلها مفيش طالب يدخل الامتحان ويحصل على صفر في مواد زي الفيزياء والكيمياء، حتى لو مش حل كويس أكيد هيكون فيه درجات، لكن إن حد يجيب صفر في مادتين ده معناه إن فيه مشكلة ،أو أني ما حضرتش الامتحان، وده مستحيل لأني مسجلة عندهم إني حضرت كل الامتحانات، أو ورقتي حصل فيها مشكلة، وده برضه صعب لأن فيه مراقبين ومراجعة للبيانات والأوراق".

وأوضحت ريم أنها تطالب بمراجعة أوراقها، قائلة: "أنا محتاجة أشوف ورقي وأعرف إيه اللي حصل، وأشوف هل الدرجات دي فعلًا درجاتي ولا لأ، أنا كنت متوقعة أجيب فوق الـ90%، وحتى لو حصل أي ظرف كنت متوقعة أقل حاجة أكون 85%، لكن النتيجة دي حاجة مش طبيعية".

وأضافت: "حتى درجة الأحياء غريبة، جبت فيها نصف درجة من 60، والنصف ده في البابل شيت مفيش، لأن السؤال الواحد بدرجة، فالنص درجة دي غريبة مع توزيع الدرجات، دي مستحيل تكون درجاتي، أنا محتاجة أشوف ورقي وأعرف اللي حصل، وأتعرف على الدرجات دي اتصححت إزاي".