خالد الصاوي عن أسوأ فترات حياته: كنت بسأل نفسي هموت إمتى؟

كشف الفنان خالد الصاوي أسرار من حياته الشخصية والمهنية وأصعب فترات حياته، وسر تفكيره في الموت.

قال خالد الصاوي عبر تصريحات تلفزيونية: «العام الماضي زي دلوقتي كنت في اسوأ حالاتي، سواء صحيًا أو نفسيًا، وعملت وقفة مع النفس عشان أعدي المحنة دي».

أسوأ فترة في حياة خالد الصاوي

وأضاف: «وصلت لمرحلة إني بسأل نفسي هموت إمتى؟ ومكنش عندي حاجة حاببها عشان أعيش عشانها، واللي ضايقني أكتر ردود فعل الناس على شكلي في السوشيال ميديا، وكانت محبطة جدًا بالنسبة لي».

واستكمل خالد الصاوي: «وأنا صغير كان عندي غرور جدًا في حياتي الشخصية، وده انعكس عليا في أدائي المهني والغرور بوّظ لي حياتي كلها، وتعلّمت إني أستغنى عن الملذات، وأواجه الغلطات في حياتي بصراحة، وأصلّح المشاكل عشان أعرف أبدأ من جديد، وأهم شيء هو السعي والإخلاص عشان أعدي أزمتي، تاريخ ميلادي الصحيح هو 25 نوفمبر 1963، وبحمد ربنا إنه وفقني في مختلف مراحل حياتي ونجّاني».

أسرار خالد الصاوي

وتابع: «لقيت الناس جنبي لما وقفت على رجلي مش وأنا مريض، وإحنا كبشر مش بنحب الضعف ومش كل الناس عندها قوة إنها تساعد حد، علاقتي بربنا اتغيّرت الفترة اللي فاتت، وكنت عايز أحافظ على الصلة اللي بيني وبينه، ومرحلة سن الخمسين كان فيها أحلى وأسوأ الأوقات في حياتي، ولقيت فيها حب حياتي واتجوزت ونجحت في بطولات أعمالي، وأخدت جوايز ونجحت ماديًا أيضًا».

واختتم خالد الصاوي: «أخطائي في مرحلة الخمسين كانت الغرور والتبذير والهدر في الصحة والوقت، وكمان الهدر في الفرص، أنا أسرع شخص ممكن يعتذر، ولما بكتشف إني غلطان وأذيت حد بندم وبراضيه، بس مش بأذي حد عن قصد، وواحشني الشغل مع أحمد حلمي، وهنشتغل مع بعض في فيلم قريب جدًا اسمه 'حدوتة'، وعايز أشتغل تاني مع تامر حسني وكريم عبدالعزيز وأحمد السقا».