خالد منتصر ينتقد تصريحات تامر حسني عن التغذية السليمة: أسئلة عيب يسألها فنان مؤثر

علق الكاتب خالد منتصر على مناشدة الفنان تامر حسني وتصريحاته، بشأن التغذية السليمة.

كتب خالد منتصر في منشور عبر حسابه الرسمي بموقع فيس بوك: «يا عزيزي تامر، الفنان العزيز، طبعًا أنت مش عايز تقول إنك مقتنع بنظام د. ضياء العوضي فبتطرح حضرتك أسئلة ساذجة وبديهية، وده لأن فضيلة د. ضياء لف لك الطب في سيلوفان ديني، وحضرتك بقالك فترة بتطلق تصريحات فيها كثير من الدروشة، لا يوجد سؤال أكثر سذاجة من سؤال الأدوية لازم تتاخد ولا لأ؟!».

تعليق خالد منتصر على مناشدة تامر حسني

وتابع: «يا سلام على عبقرية السؤال الثوري الرهيب، اللي محتاج د. مجدي يعقوب يذاكر ويرد عليه!.. ده عامل زي سؤال هي لازم الشمس تطلع؟!.. اللي كان بيقوله د. ضياء يا أخ تامر اسمه في الطب ضلالات، والضلالات لا تناقش، ما تقوليش، ما تناقشه في أن الانسولين مهم للمرضى أطفال السكر، وأن عدم شرب المياه مفيد للكلى!.. لأن ده كأني بناقش واحد في عنبر الخطرين وعايزني أقنعه إن مش هو عبدالحليم حافظ!، هيقتنع إزاي؟!، لو جبت له عبدالحليم نفسه مش هيقتنع،

نيجي بقى للجزء بتاع هرمونات الفراخ، وهقولها لحضرتك بلغة بسيطة وعامية زي ما أنت عايز، ما يقال عن أن الفراخ البيضا محقونة هرمونات عشان كده كبيرة عن البلدي، الكلام ده من قبيل الهرتلات والترهات، ليه؟.. عايز سيادتك تسأل عن سعر هرمون النمو اسمه growth hormone.. عشان الهرمون ده يحقنه صاحب المزرعة في كل فرخة عشان يكبرها محتاج ملايين الجنيهات».

واستكمل خالد منتصر: «يعني الفرخة الواحدة عشان يكسب تبقى بخمستلاف جنيه حضرتك!.. هتقول لي لأ، هو إحنا عبط، دول بيضحكوا علينا ويحطوها في أكل الفراخ مش حقن، هقول لك الهرمون ده بروتين بيتكسر في المعدة وما يبقالوش فايدة يا تامر يا عزيزي!، أمال الفراخ دي كبيره إزاي؟، اشمعنى، هقول لك من خلال نظرية التطور اللي السلفيين بيكرهوها، زي ما فيه انتخاب طبيعي في الحياة، فيه حاجة اسمها انتخاب صناعي، بيعمله البشر، وحضرتك بتحب الكلاب وعارف دور الانتخاب الصناعي وتحسين السلالات في الكلاب، اللي خلتهم عشرين ألف شكل ولون».

انتقاد خالد منتصر لتامر حسني

واختتم: «أهو خبراء الفراخ عملوا الانتخاب الصناعي ده، لغاية ما وصلوا لشكل الفرخة الكبيرة المليانة لحم دي، هي دي الحكاية ببساطة، ياريت نبطل فتي وهبد، وما نصنعش أصنام من عجوة، وكل فنان عايز يقدم لنا نفسه كداعية، يخليه في فنه، ودي ما بيقعد مع دعاة كاجوال، يحاول يفضي نفسه ساعة ويقرأ كتاب فؤاد زكريا التفكير العلمي، مستعد أبعته لحضرتك ولحد عندك البيت، لكن اعذرني الأسئلة اللي ـنت بتسألها دي، عيب شخص وفنان مؤثر زيك يسألها، مكسوف تقول إنك مقتنع بالطيبات، كل نوتيلا وربع كيلو سكر وما تشربش ميه في هدوء، وبعيد عن جمهورك اللي للأسف مش ناقص تشويش».