سارة سلامة تكشف حقيقة ضرب والدها لها ومفاجأة عن محمد رمضان

تحدثت الفنانة سارة سلامة عن طبيعة علاقتها بوالدها الفنان أحمد سلامة، وكيفية الأخذ برأيه في أعمالها الفنية التي تقدمها.

قالت سارة سلامة عبر تصريحات تلفزيونية: «بابا صاحبي جدًا ولما الناس بدأت تنتقد كتير بيتقال حاجات مش حقيقة، أنه ضربني وضربنا بعض معرفش الناس بتجيب ده منين، بابا ده صاحبي، وبحب الصحوبية معاه وصديقي المقرب وهو مش قاسي حنين جدًا وبيقف مع الناس وبيعرف إزاي بيتعامل مع المرأة».

أسرار سارة سلامة

وأضافت: «كنت اتظلمت الفترة الأولى لما دخلت التمثيل، بسبب الجراءة وكنت صغيرة ولسه بتعلم، وبابا لما كان يشوف ده يقول متمردة، ولو حصل منه حاجة أو علق على برنامج بعاتبه وأقوله أنت ليه شايفني كده وأسمع رأيه، وهو لو ايه حصل بييجي يصالحني».

وفيما يخص علاقتها بالفنان محمد رمضان، قالت سارة سلامة: «محمد رمضان صديق مقرب ليا جدًا وبشوف أنه وش السعد عليا، بحب أتكلم معاه جدًا وأخد رأيه في كل حاجة، وبيديني أمل في الحياة ومبيخليش حاجة تأثر، بيخليني عايزة أقوم أكسر الدنيا، ومش هييجي زيه تاني في التمثيل.. هو مش بيستفز الناس هو طيب جدًا ولكن في ناس شغلها في الحياة أنها تنتقد، لو عملتي عمرة ينتقدوا، لو اتحجبتي وقعدتي في البيت دول مش هنخلص منهم».

تصريحات سارة سلامة

وعن تعرضها لانتقادات في مسلسل نقطة سودا، قالت: «كان في هجوم عليا وقت مسلسل نقطة سودا، مفيش حد محدد عملي الحملة دي، الشخصية في المسلسل دور واحدة مستفزة وشريرة كمان، بعمل دور وبأديه ومش طبيعة حياتي عايشة كده بالميك اب، المسلسل من أصعب الأعمال اللي عملتها في حياتي، وظروف تصويره مختلفه، وكنت بصور في لبنان وحرب شغالة وكنا بنسمع الصواريخ وقت التصوير، وقالوا غيرت ملامح وشي، اتضايقت جدًا وأنا معنديش مشكلة في الانتقاد ولكن يكون بشكل محترم، ليه أهين!؟ في الآخر إحنا بني آدمين بأدي دور أتطلب مني، وأكيد لو في أي عيب حواليا ناس كتير لو ينبهوني، الميك اب بيتعمل بيه مليون حاجة».

واختتمت سارة سلامة حديثها بشأن حصرها في أدوار معينة منذ ظهورها ودخولها التمثيل، معلقة: «معرفش الناس مركزة معايا من ساعة ما بدأت تمثيل، معرفش ده تركيز زيادة من الناس، وممكن بدايتي في سن صغير، عملت أدوار كتير جدًا بشخصيات مختلفة نفسي أخرج من البنت الشيك الجميلة الهادية، ظلمتني شوية، في الأول كنت مبسوطة بده ورجعت قولت ممكن ألعب حاجة غيرها، وده دور المخرجين برضو أنهم ميكرروش الشخصية للفنانة، نفسي أحط بنت متحطش ميك اب خالص وعايشه في الشوارع وبتقابل مواقف حقيقة».