رد الفنان عباس أبو الحسن على التساؤلات بشأن مقاطعته لضيوف البودكاست الذي يقدمه، وانتقادات حلقته مع المنتج أحمد السبكي.
كتب عباس أبو الحسن في منشور عبر حسابه الرسمي بموقع فيس بوك: «إيماءًا إلى الحلقة 110 من بودكاست حوارات مع عباس وضيفي فيها هو المنتج الكبير الأستاذ أحمد السبكي، معظم التعليقات المكتوبة على الحلقة (في يوتيوب) لمتابعين محبطين إني بقاطع الضيف ولا أنتظر كامل الإجابة وانتقل إلى موضوع آخر.. طب عباس بيقاطع؟ ده حقيقي جدًا، بس ده الشق اللي كان بدون قصد وفي المواسم الأولى، ببساطة لأني ADHD ودي سمة رئيسية فيهم، لا يدركوها وصعب جدًا التخلص منها».
عباس أبو الحسن يرد على منتقدي مقاطعة ضيوفه
وتابع: «وكان ممكن أقول لنفسي هي دي طريقتي واللي ميعجبوش ميلزموش، وأكمل زي ما أنا، لكن أنا صممت إني أتطور واشتغلت على نفسي حلقة ورا حلقة لحد ما المتابعين نفسهم الناقدين لي لاحظوا فرق هائل وحيوني عليه وأنا فخور بده وبعد هذا التطور، جه نوع تاني من المقاطعة، وهي المقاطعة الرقيقة الواعية المتعمدة واللازمة، والشر الذي لابد منه، في حالات استثنائية نادرة، ومنبعها أن لما يلبي ضيف طلبي باستضافته، تكرمًا منه وفقط محبة لعباس وهو نفس الشخصية العامة اللي بيرفض أرقام بتتحطله للظهور في برنامج أو بودكاست آخر، وانا لسه معنديش نسبة المشاهدات العظيمة المغرية، الضيف من أول ما بيشرفني في بيتي، فأنا تلقائيًا، بوعي أو وازع داخلي، بعتبره مستأمني شخصيًا على خصوصيته وسلامته إعلاميًا في كل ماخرج وكل ما يخرج من فمه».
واستكمل عباس أبو الحسن: «ولأنه جاي قعدة معايا، فهو سايب إيديه، ومبيحسبهاش عكس لما بتسضيفه برنامج شهير، فأصبح تلفائيًا مستأمن عليه، ورقيب على كلامه، بحيث لا يستطيع صحفي أصفر متصيد يجتزأ أي فقرة ينشرها تشويهًا له، أو ويسببله أي نوع من متاعب التعرض بحديثه للمحاذير، أو الصدام مع كل أشكال السلطة العديمة المرونة، بما فيها سلطة الأعراف والمقدسات الاجتماعية الجمعية وأنا منحدر من صلب رجالة فلاحين جدعان ضيوفهم على راسهم وقبلها في حماهم وعلى مدى 110 حلقة لم تحدث مشكلة واحدة ولو صغيرة لأي حد من ضيوفي الكرام».
وأضاف: «المقدمة المجهدة دي عشان أوصلك إني بفهم تركيبة الضيف اللي جاي، وقبل حضوره، ببقى عرفت درجة صراحته ودرجة شجاعته وتمرده ومستوى تلقائيته، سميها زي ما تسميها وبالتالي في حالات معينة تختلف من حلقة لأخرى، باختلاف نشاط الضيف لازم “أقاطع” أو أدير دفة الحوار في اتجاه آخر، لأني عارف ضيفي الشجاع، واللي ارتاح في قعدته وصار على سجيته رايح فين بكلامه، وأن كل اللي هيكمل فيه أنا هشيله في المونتاج تلقائيًا، وأحيانا دون سؤاله، ولأنه ببساطة كتير ما الضيف وهو ماشي.. بيبصلي بصة خاصة ويقولي بصوت خفيض راجع الحلقة بنفسك، وانا اكتفي يإيماءة طمأنة».
كواليس حلقة عباس أبو الحسن مع أحمد السبكي
وقال أيضًا: «والحقيقة أنا يهمني ما يبوح به ضيفي من مشاعره الإنسانية والوجدانية حين وجد أُذن تنصت بصدق وجليس يحترم عقله ومفتون به.. أنا لا محاور ولا مذيع ولا بحاول أطلع معلومة معينة، أو يخلي الضيف يفضي كل اللي عنده، ولا يزنقه فيطلع المستخبي ولا سبق إعلامي ولا أي بتنجان من ده.. ببساطة أجل أنا عنده فضول لا حدود له بالتجربة الإنسانية ونشأة التكوين، والصرامة الذهنية ورحلة الشخصية بالشك واليقين، وبالطفل جواه اللي كبر وحلم، وبدأ ينتج ويبتكر ويبدع ويخلق فن وأداء وعلم ومهارة عظيمة مبهرة.. نرجع لأول الكلام، وهي التعليقات على مقاطعتي المتعددة في حلقة المنتج أحمد السبكي، أحمد السبكي بطّل يطلع في لقاءات، لأنه راجل شجاع مستقل حر ودمه حامي، وتلقائي إلى حد الاندفاع، ومعندوش فرامل وده سر خلطته الإنسانية والمهنية، ده سبب له أزمات ومتاعب في غنى عنها طالت عمله».
واختتم عباس أبو الحسن: «الحاج أحمد السبكي وابنه الصديق العزيز كريم، حاولوا يعتذرولي كتير لنفس الأسباب دي، لأن مش هيجيلهم إلا وجع الدماغ، لكن في الآخر استئمنوني ووافقوا، فكان عليّ أدير دفة الحوار بشكل يستهلكه وكمان منرميش مقاطع من كلامه في المونتاج.. لكن حافظت على روحه ووجهه نظرة ومعاييره المهنية ورؤيته للإنتاج السينمائي.. وأخيرًا مش لأن فيه مائة برنامج يوتيوبي مقدمينه حطو مايك قدامهم ولبسوا سماعات في ودان وقعدوا يسألوا نفس الأسئلة السطحية المستهلكة اللي بتطفي الضيف ويخليه أتوماتيكيًا يحط جدار عازل يبقى بودكاست.. البودكاست مش انترڤيو، ولا هو مجرد سؤال وجواب هو تفاعل طبيعي، وقعدة حوار تلقائي، وحالتي أنا شخصيًا مختلفة، لأن الحلقات هي حوار تفاعلي بين عباس بشخصيّته وتجربته وقناعاته، وبين طرف أخر هو صديق، أو شخصية تجمعني بها الود والإعجاب والاحترام المتبادل، شخصية استثنائية في مجالها، يعني مش مذيع بيسأل ضيف، وأنت كمشاهد خدها.. كأنك بتتفرج عليها زي ما بتتفرج عليها، كعمل درامي بروحها بعيوبها.. يعني البودكاست ده تحديدًا طبيعته أنه مش معمول بوعي أن في حد بيتفرج علينا.. وإني عايز أوصل معلومة ودي لسبب ما قوة جذب النوع ده من البودكاست.. يا تاخده بعبله يا تسيبه كله.. وساذج من يعتقد أن أنا كسيناريست وممثل متحقق، فجأة وفي عمري الخمسيني قررت أبقى مذيع يا وديع».
