عمر محمد رياض يتحدث عن اتجاهه للكتابة وكيف تدعمه جدته شهيرة

تحدث الممثل الشاب عمر محمد رياض، عن اتجاهه للكتابة، وكذلك مشاركته في مسلسل نصيبي وقسمتك، وتحدث أيضًا عن جدته الفنانة شهيرة، التي أوضح أنها تدعمه دائمًا.

عمر محمد رياض يتحدث عن اتجاهه للكتابة

قال الفنان عمر محمد رياض، في تصريحات تلفزيونية: 'أنا من وأنا صغير بحب الكتابة جدًا ولكن الموضوع متطورش معايا لغاية ما في يوم قررت إني أروح أتعلم في ورشة أستاذ أحمد مراد، والورشة دي فادتني جدًا وخلتني في حتة تانية'.

وأضاف: 'أنا شخصيتي لما بحب حاجة بدرسها، لأن موهبة من غير دراسة بتتعطل كتير ومبتكونش ماشي في الطريق الصحيح، وبعد كده بدأت أدخل في حاجات أكتر وكتبت فيلم حجر إيجابي، وكمان حاولت أستفيد من أستاذ عمرو محمود ياسين خالي عنده خبرة كبيرة في المجال، وقرأت كتير واتفرجت على أفلام كتير بعين كاتب مش مشاهد'.

واستكمل عمر رياض: 'أنا شايف إني اتجهت للموضوع متأخر شوية، لأني لو كنت دخلت بدري شوية كان هيبقى أفضل كتير، ودي نصيحة لأي حد لو أنت شايف في نفسك أي موهبة حتى لو صغيرة تاني يوم أبدأ على طول، وشغلك كتير وسعيك أكيد هيوصلك'.

كواليس مشاركة عمر محمد رياض في مسلسل نصيبي وقسمتك

وعن مشاركة عمر محمد رياض في حكاية أوضة وصالة في مسلسل نصيبي وقسمتك، قال: 'أنا كنت متفاجئ من ردود الأفعال، وفكرة الوسطة أنها تستفز حد علشان المؤلف عمرو محمود ياسين خالي، أو أشتغل مع حد من العائلة، أنا ممكن أتفهم ده جدًا، ولكن الحكم للممثل هل بيعرف يمثل ولا لأ وهل أقنع المشاهد ولا لأ، وأنا كنت محظوظ إني كنت في مشروع ناجح زي نصيبي وقسمتك، والجمهور كان كل رأيه عن عمر، ومن أحلى التعليقات من الناس أنهم قالوا إني مش أول مرة أمثل، وأتمنى أفضل عند حسن الظن، لأنها مسئولية كبيرة جدًا'.

واختتم حديثه، وقال: 'جدتي أكتر حد شجعني على الموضوع من الأول ومن زمان كانت شايفة فيا حاجة من قبل ما أنا أشوفها في نفسي، وقالتلي عايزاك تقدم في مركز الإبداع الفني مع الأستاذ خالد جلال، وروحت قدمت والحمد لله اتقبلت، وهي قالتلي على الطريق من بدري وادتني نصائح وثقة في نفسي، وأن الممثل بيحتاج ثقة كبيرة ودي أهم حاجة'.