قتلته وهو بيعلق زينة رمضان.. والد ضحية غدر زوجته في البحيرة يكشف مفاجآت صادمة عن الجريمة

أكد والد محمد علي العبد، ضحية غدر زوجته في مدينة رشيد بمحافظة البحيرة، أن نجله قُتل طعنا بمقص أثناء محاولته تعليق زينة رمضان في شقة الزوجية، وذلك إثر مشادات كلامية وخلافات أسرية متكررة.

وقال الأب خلال لقائه مع الإعلامية نهال طايل في برنامج «تفاصيل» المذاع على قناة «صدى البلد»: 'لقيت واحد جاي بيقولي إلحق ابنك اتعور، رحت المستشفى لقيته مفتح عينيه ونايم، مفيش حد جنبه خالص والدنيا زحمة، قعدت أدور على دكتور عشان يشوفه، لقيته جاي بيقولي الله يرحمه وهو مفتح عينيه.. اتجننت أنا بقى وما عرفتش أصدق نفسي، مش عارف أعمل إيه'.

وأضاف الأب أنه لم يكن موافقًا على الزواج منذ البداية بسبب القرابة، مؤكدًا أنه حاول عدة مرات نصح نجله بعدم استكمال الزواج، قائلاً: 'أنا ما كنتش راضي بالجوازة دي، وقبل كده طلقته منها وخلاص، شهر ولا حاجة وقلت له اقعد معايا هنا ونجيب لك اللي أنت عايزه، قاموا هربوه وكلموه وقالوا له تعالى عشان البنت عايزاك وما فيش حاجة تانية هتحصل'.

وأوضحت والدة المجني عليه أن الزوجة كانت دائمة افتعال المشاكل ولم تكن تكن مشاعر حقيقية لابنها، ووصفت تصرفاتها قائلة: 'البنت كل شوية تقوله إيه؟ ترمي الدبلة من إيدها وتعمله كده، وهو يا عيني كان في إيده دبلة، يقوله أنا مش بحبك، بعد ما دخلت عليه، كل شوية تعمل أي حركة قدامه، يقولي هي بتعملي كده يعني خلاص بقى، ويقوم يصالحها ويبلع لها'.

واختتم الأب حديثه : 'كنت باجي الساعة 2 بالليل أقعد معاهم، ألاقيهم بيتخانقوا، أدخل أصالحهم.. كل شوية أجيهم ألاقيهم بيتخانقوا، أقولهم كدة غلط عشان الجيران، تقولي أنت مالكش دعوة أنت'.