«كانت المعنى الحرفي للبهجة وتوفيت بالسرطان».. جيلان علاء تكشف صلة قرابتها بالفنانة هالة فكري صالح

كشفت الفنانة جيلان علاء صلة قرابتها بالفنانة هالة فكري صالح، والتي رحلت عن عالمنا قبل 3 سنوات.

كتبت جيلان علاء في منشور عبر حسابها الرسمي بموقع فيس بوك: «يمكن دي أول مرة هتكلم فيها عن واحدة عزيزة عليا أوي.. واحدة كانت قريبة ليا في كل حاجة.. أعتبر شبهها في كل تفصيلة في ألوان البشرة والشعر.. في تقليد الشخصيات.. في حب الفن.. في التفكير في المستقبل.. في الصعوبات اللي بتواجهنا عشان نحقق نفس الحلم تقريبًا».

وتابعت: «بس هى في الغنا وأنا في التمثيل.. الواحدة دي تبقى هالة فكري صالح عمتي.. كنت بحبها حب مش عادى.. الناس كانوا بيفتكروها أختي الكبيرة.. أصلاً أى حد كان بيشوفها كان بيحبها أوي لذيذة وتلقائية ودمها عسل كانت معجونة بالفن زى ما كانت بتقول».

واستكملت جيلان علاء: «صوت حلو تلاقي.. تمثيل جبار تلاقي.. مذيعة في الـ art تلاقي.. مفيش حاجة مش بتعرف تعملها

كان ليها قصة مع الله يرحمها الفنانة شادية كانوا عايزين يعملوا قصة حياتها ورفضت كل أشباهها ما عدا هالة.. هى حبيتها ووافقت عليها بس للأسف المشروع ده مكملش.. كانت بتحكيلي على ذكريات كتيرة ليها من وهى صغيرة مع الفنانين مكنتش بصدق إنها قابلت كل دول».

وأضافت: «نسيت أقولكوا إن أبوها اللي هو جدي كان وكيل وزارة الثقافة في هيئة السينما.. فعادي يتعشوا مع نبيلة عبيد ويتغدوا مع محمد منير.. حاجات كدة كان نفسي أحضرها بس كنت صغيرة.. المهم لما كبرت وهى كمان كانت بتكبر كان حلمها بيكبر معاها.. و هو إن كان نفسها تغني تاني بعد ما عملت حفلة حلوة أوي مع الموسيقار عمر خيرت.. بس للأسف القدر كان له رأى تاني.. هالة اختفت.. عني و عن كل الناس.. مش عايزة حد يكلمها ولا يعرف طريقها… مش عايزة حد يشوفها ولا تشوف حد».

وقالت جيلان علاء أيضًا: «هتقول لي اكتئاب.. هقولك لا.. سرطان.. سرطان قولون شرس من سنين ومكانتش تعرف ولا حد كان يعرف بس هى قررت تتعالج وتنعزل روحتلها بيتها كذا مرة مكانتش بتفتح بترد مرة أه و 100 لا.. كان نفسي تحضر خطوبتي وجوازى لكنها مقدرتش خافت نشوف شكلها نتأثر ونزعل خافت طاقتها اللي كلها حب تكون طاقة عذاب لينا

بس كانت مع كل ده كانت بتغني وتخفف عن اللي كانوا بياخدوا كيمو في الجلسات تغنيلهم وتغني معاهم».

واختتمت: «كانت لذيذة ودمها شربات كانت المعنى الحرفي لكلمة "بهجة" بس بعد محاربة طويلة من الألم والوجع

ماتت.. أنا عمري ما اتكلمت عنها على السوشيال ميديا ولا عبرت عن مشاعري دي .. بس عارف أما شخص يهف عليك ويهف أوي.. وحشتني.. و بعادها مأثر فيا جدًا ونفسى الناس تعرف هى مين.. اترحموا عليها وادعوا لها وادعوا لحبايبها بالصبر».