ليلى طاهر بعد شائعة وفاتها: مش أول مرة والفن كان واخدني من أسرتي

ياسمين حمادة 14 يونية 2023 | 08:27 صباحاً

علقت الفنانة ليلى طاهر على شائعات الوفاة التي تطاردها، قائلة: «أنا زي الفل بس الناس مش مقتنعة، ومش أول مرة حصل قبل كده 3 أو 4 مرات».

تعليق ليلى طاهر على شائعة وفاتها

قالت الفنانة ليلى طاهر في تصريحات تلفزيونية لها: «زمان كنت بضايق ولكن دلوقتي مابقتش أضايق وبقول دول هبل ومش عندهم حاجة يكتبها فيكتب أخبار وفاة، ولفت نظري حب الناس اللي ماتعرفنيش في الشارع».

وتابعت: «وفي كل مكان وبحثهم عن رقمي عشان يطمنوا علي ولقيت الناس هجموا عليّ في نادي الجزيرة، وكأنهم شافوني أول مرة قعدوا يحضنوني ويبوسوني ويشتموا في اللي كتب الخبر، وعشان حب الناس ليا واحترامهم لي مش هنزل درجة واحدة عنه وعشان تاريخي اللي الناس بتعتز بيه».

ليلى طاهر

تصريحات ليلى طاهر

واستكملت ليلى طاهر قائلة: «أنا سعيدة بالخبر ده وسعيدة علشان بحس بحبكوا ليا، يمكن قصدوا إنهم يزعلوني لكنهم أسعدوني، وأنا مش فاهمة جابوا الخبر ده ومش أول مرة، وكل شهر بيكتبوا الخبر وهما مش لاقيين حاجة يكتبوها، قاصدين يوصلوا المعلومة الكاذبة ليه بقى أنا مش عارفة، أنا بحب الفن بكل صور، تلاقيني في وقتي الفاضي كله بتفرج على التلفزيون بشوف المسلسلات والوجوه الجديدة».

وأضافت: «سعيدة إن الفن المصري بيرجع لأصله تاني، لأنه مر بوعكة بسبب الظروف اللي حصلت في البلد، بقوم الصبح أقرأ الأخبار في الموبايل، وأشوف الرسائل وأرد عليها، وبعدين أقوم أمشي في الجنينة وألعب مع الكلاب شوية، وأشوف لو ورايا حاجة أعملها ورايا زيارة مهمة، أروح النادي، الحياة الأسرية الفن كان واخدني منها شوية».

عودة ليلى طاهر للتمثيل

وفيما يخص عودتها للتمثيل، قالت: «وبالتالي مش عاوزة أعمل حاجة أقل درجة مما قدمته وإلى الآن لم أعثر على شيء يتسق مع ما قدمته خاصةً أن المرحلة العمرية اختلفت، ونوعية الفن لكن مش هعمل حاجة أقل من اللي قدمته، وأبرز الأدوار المقربة لقلبي فيلم الأيدي الناعمة وصلاح الدين وهاملت».

واختتمت: «مينفعش أرجع دلوقتي لـ الفن، وكان نفسي ومنى عيني أستمر في الفن لآخر يوم في عمري، والتوقف اللي حصل خلاني أتوقف، ومجاش ليا دور حلو لغاية دلوقتي، وأتعرض عليّ أدوار مش بنفس المستوي، وأرجع بحاجة قوية جدًا يا بلاش، واللي أنا عملته مبسوطة وأفتخر به».

ليلى طاهر