ردت الفنانة مريم الخشت على منتقدي بشرتها في مسلسل طالع نازل، بعد عرض الحلقة الأخيرة من العمل.
قالت مريم الخشت عبر تصريحات تلفزيونية: «أنا مش متابعة السوشيال ميديا، ومابشوفش الحاجات بسهولة، لقيت إن في ناس بتبعت لي صور Screenshots من مجموعات على الفيسبوك».
وتابعت: «وبيقولوا لي بصي الناس بتدافع عنك، وأنا مش عارفة بيدافعوا عن إيه ومش فاهمة فين المشكلة، معرفش حاجة خالص، ومن كتر ما كانت بتجيلي حاجات وبقراها فهمت اللي حصل».
واستكملت مريم الخشت: «لا ماتضايقتش لأني مش مؤمنة بالكلام ده بصراحة شديدة، ولا هي حاجة هزاني فلما أسمع حد بيتكلم عليها تهزني أكتر، الموضوع مكنش في بالي خالص، وكون إن فيه دكاترة أخدوا صورة عشان يعملوا دعايا عليها، حاسة إنه شيء متوقع وطبيعي».
وأضافت: «المسلسل ناجح جدًا الحمدلله، ومن الطبيعي إن كل الناس بمختلف مجالاتهم يشوفوا طريقة للمجال اللي هما فيه يلمس مع المسلسل ده بنجاحه عشان يستفيدوا من الكلام والتريند على هذا المسلسل ومافكرتش أخد أي إجراء قانوني، الناس دي بيعملوا كدة عشان يستفيدوا من شيء معين، وأنا الكلام مضايقنيش وسبحان الله كان في كمية ناس بترد أصلا كإني أختهم واتبسطت جدًا إن الناس كانت شايفة الموضوع يخصهم هما، وبيدافعوا كأني من عيلتهم وكانت حاجة حلوة جدًا».
وقالت مريم الخشت أيضًا: «يمكن الناس خدت إن اللي بيطلع في التليفزيون بيطلع بشكل مثالي جدًا مع إن دي مش حقيقة، الأشخاص المثالية جدًا ومعمول لها Digital Makeup أو أي إجراءات أخرى، دي اختيارات شخصية ومن حقهم وبتاعتهم، ودا طبيعي».
واختتمت: «لكن أنا مش الشخص ده ومابحبش الحاجات دي، أنا واحدة بصور مسلسل صعب جدًا ومجهد جدًا، والمكياج اللي طول اليوم بيجهد البشرة بشكل غير طبيعي، فلما بيكون الواحد بينام قليل وبيشتغل كتير وتحت ضغط ومكياج طول اليوم، لو بشرتي محصلش فيها مشاكل يبقى أنا مش بني آدم حقيقي، أكيد أنا باربي، وبدأوا يتكلموا إن الممثلة جلدها مش المفروض يبقى فيه أي شوائب من أي نوع، ليه هي مش إنسانة».
