مصطفى بكري للمشككين: اللي عنده حاجة عليا ولا أحمد موسى يطلع راجل ويروح يقدمها للنائب العام

وجه الإعلامي مصطفى بكري رسالة للمشككين في بعض الإعلاميين، وعلى رأسهم نشأت الديهي وأحمد موسى قائلا: «ليه إعلامي بوزن نشأت الديهي يقول هعتزل الإعلام، نشأت الديهي وأحمد موسى ومحمد الباز مع الدولة، ومش معنى إن أنا مع الدولة يبقى بطبل، إذا كانت الحملات الإعلامية الممنهجة تتناول حجم التطاول على أحمد موسى فهو مردود عليهم ولا يؤثر فينا».

وصرح خلال تقديمه برنامج «حقائق وأسرار» على قناة «صدى البلد»: «قول اللي أنت عاوزه.. مواقفنا واضحة وهو الدفاع عن الدولة والوقوف بجوار القائد الوطني اللي أنقذ البلد.. الناس مش بتنسى أبدا.. دولتنا تستحق نقف معاها وجيشنا يستحق أن يحس فيه وراه ظهير شعبي.. كل ظابط شرطة بيبقى في الشارع باليل وأنت نايم في بيتك هو ده الأمن والأمان».

ونوه مصطفى بكري: «سهل جدا تعمل تريند لكن في النهاية البلد اللي هتخسر.. اوعوا تفكروا أن الآخرين عاوزين المصلحة دول عاوزين يصدروا لنا المشاكل والادعاءات والأكاذيب، وافتكروا أصوات 25 يناير راخوا فين.. اللي اتجند واللي شغال برا.. الدكر هو اللي يقعد هنا في البلد دي.. إيه اللي هنعوزه سواء أنا ولا موسى ولا نشأت من دفاعنا عن الدولة.. أنا اتسجنت 5 مرات بسبب الدفاع عن البلد.. ندخل الصدام من أجل البلد.. وبقول لو دكر عنده معلومة عن أي حد بيدافع عن البلد يقدمها للنائب العام فورا».

وأضاف بكري: «إحنا ولاد غلابة وبنفخر بآبائنا ولما بنزل البلد بروح قُرانا وأزور خالتي بخيتة وأقعد وسط أهلي وناسي.. مش عاوزين ميزة ولا أي حد فينا أخد ميزة.. هو أنا ينقصني الكلام علشان أقول اللي عاوزه.. ما أنا بقول في مجلس النواب وينتكلم عن المشكلات زي قانون الإيجار والمعاشات والعدادات الكودية».

وواصل قائلا: «أنا مش أشرف من جندي واقف في معركته بكل قوة وإيمان.. ولغاية آخر يوم في حياتنا مع جيشنا ومؤسسات الدولة ومع الراجل اللي شايل اليلد.. كل مشكلة تتحل إلا البلد لو حصل لها حاجة انسوا.. اللي عاوز يغسل سمعته أو ضد الدين بيعمل نفسه معارض.. وقناة صدى البلد تقاتل دفاعا عن الدولة.. يملكها رجل وطني وشريف السيد النائب محمد أبو العينين.. منذ 15 سنة وستظل خلف مؤسسات الدولة ومصلحة البلد».

واختتم مصطفى بكري: «هاتوا لي موقف واحد يقول أني طبعت مع إسرائيل.. هاتوا لي كلمة واحدة قلتها في يوم أني ضد الجيش ولا دعيت الناس تخرج ضد البلد.. عاوز تختلف مع أحمد موسى اختلف بس إياك الشتائم وقلة الحياء.. أحمد موسى ونشأت الديهي مواقفهم واضحة مع الدولة وضد الإخوان.. أنا اتحبست في كل الأنظمة وعشنا المرارة وشفنا المزلة وكنت أول واحد يقول يسقط حكم المرشد.. اللي عنده حاجة عليا ولا أحمد موسى ولا نشأت يطلع راجل ويروح يقدمها للنائب العام».