مفاجأة.. دينا تكشف سبب طلاقها 9 مرات وأول حب في حياتها

كشفت الفنانة دينا أسرار من حياتها الشخصية، وخاصةً علاقاتها العاطفية وعدد زيجاتها.

قالت دينا عبر تصريحات تلفزيونية: «أكتر واحد حبيته وأنا صغيرة جدًا أتوفى وأنا عندي 15 سنة، اتخطبنا وعملت خطوبة ولبست فستان أبيض قصير عندي صوره».

زيجات دينا

وتابعت: «كان أخو هادي الجيار كان اسمه طارق الجيار الله يرحمه، دا أول وأهم حب في حياتي، واتجوزت 9 مرات، مش رقم مفزع تحية كاريوكا اتجوزت 13 مرة، معنديش مانع أتجوز».

واستكملت دينا قائلة: «بستغرب من اللي بيقول مش هعمل كده تاني تعرف منين الدنيا هتوديك فين، أنا مكنتش مخططة إني أتجوز 9 مرات لو عليا لأ، أصحابي لما واحدة تطلق بمنعها».

الراقصة دينا

تصريحات دينا

وقالت أيضًا: «أنا رومانسية جدًا بس الحب مش موجود أنت بتخلقه، مفيش حاجة اسمها حب أنت اللي بتبقى عايز تعيش في حالة حب فبتعيش اللحظات السعيدة اللي بتديها لنفسك لحد ما البلونة تفرقع».

وأضافت دينا في حديثها: «الحب اللي من أول نظرة ده في المسلسلات التركي، أنا حبيت كتير، حبيت ناس ارتبط بيهم وحبيت ناس مرتبطش بيهم، أنا مهنتي مش سهلة وارتباط راجل بيا مش سهل ولازم يبقى عندة كمية ثقة بالنفس غير طبيعية».

انتقادات ضد دينا

وكشفت سبب طلاقها أكثر من مرة قائلة: «أنا اتطلقت كل الطلاقات عشان أنا رقاصة كل الجوازات مكملتش 3 أو 4 سنين، أقصر جوازة كانت سنتين وأطول جوازة كانت 5 سنين».

وفيما يخص تعرضها لانتقادات أن سنها لم يعد مناسب لمهنة الرقص، علقت قائلة: «أنا حرة هو أنا بروح لهم أخبط عليهم في البيت أرقصلهم اللي بيضايق ميتفرجش، شغلتنا أنت بتجيبني بفلوس مش ببلاش أنت بتدفعلي، المكان بيجبني بيدفعلي لو أنا مش كفء لا هيجيبني ولا هيدفعلي».

الراقصة دينا