ملك زاهر تحتفل بعيد ميلاد شقيقتها ليلى بفيديو مؤثر: عدينا بكل حاجة سوا

ياسمين حمادة 30 اغسطس 2025 | 03:55 مساءً

احتفلت ملك زاهر بعيد ميلاد شقيقتها ليلى زاهر، اليوم السبت 30 أغسطس الجاري، بفيديو ورسالة مؤثرة.

نشرت ملك زاهر مقطع فيديو يجمع لقطات ولحظات من عدة مناسبات عاشتها مع شقيقتها ليلى زاهر، عبر حسابها الرسمي بموقع انستجرام.

ملك زاهر تحتفل بعيد ميلاد شقيقتها ليلى زاهر

وعلقت على الفيديو قائلة: «صحيح مليانة الدنيا أحضان بس أنت مش أي مكان أنت بنسبالي أمان.. عيد ميلاد سعيد أختي توأم روحي يا أماني، وصديقتي المقربة للأبد.. إنتي مش بس أختي، إنتي دنيتي كلها، اللي بيربطنا حاجة الكلام عمره ما هيعرف يوصفها، أقوى من أي شئ في الدنيا، مش بس إخوات، ولا أصحاب قريبين أعمق من كده بكتير».

واستكملت ملك زاهر في رسالتها لليلى زاهر: «وأنا بدور في صورنا اكتشفت إننا عدينا بكل حاجة سوا، في الحلو والوحش، ماكانش فيه لحظة حد فينا عدى بحاجة كويسة أو وحشة من غير التاني ماكانش واقف جنبه، من سنين الحضانة لأيام المدرسة، وإحنا بنذاكر سوا، ونخرج مع نفس الصحاب، نلبس نفس اللبس، ونشارك نفس الضحك والدموع، روحنا الجامعة واتخرجنا سوا، نجحنا سوا، وكبرنا سوا، شُفتك ماشية على الممر يوم فرحك ودموعي نازلة من فرحتي، عشان رغم إنك كنتي بتبدأي فصل جديد في حياتك، كنت أسعد أخت في الدنيا وفخورة بيكي وأنا عارفة إن كل خطوة جاية، حتى لو مش تحت نفس السقف، هنكملها سوا».

تصريحات ملك زاهر

وأضافت: «بالنسبالي إنتي أكتر من أخت، بنتي، وفرحتي، وأكبر نعمة في حياتي، على طول فخورة بيكي، وواقفة في ضهرك في كل خطوة في رحلتك، إنتي أكتر شخص بحبه، الشخص اللي بفرح بيه أعلى من فرحتي بنفسي، واللي هفضل طول عمري شاكرة ربنا إنه رزقني بيها، بتوحشيني كل ثانية، بس مفيش حاجة بتخليني أسعد أكتر من إني أشوفك مع الراجل اللي بتحبيه، وعايشة الحياة اللي يستحقها قلبك، وأنا عارفة إن ده مجرد البداية، لأنك اتولدتي عشان تفضلي منورة متألقة للأبد».

واختتمت ملك زاهر: «أنتي كل حاجة ليا، وفخري الأبدي، وأعظم حب.. عيد ميلاد سعيد أختي وبنتي، وقلبي وأنا مش عايز غيرك دائمًا وللأبد».