مي عمر: «مستنية لحظة افتتاح المتحف المصري الكبير.. فخر جديد لمصر قدام العالم»

حسين أنسي 30 أكتوبر 2025 | 05:27 مساءً

أعربت الفنانة مي عمر عن فخرها وسعادتها الشديدة بالتطور الكبير الذي شهدته منطقة الأهرامات خلال السنوات الأخيرة، مؤكدة أن زيارتها الأخيرة جعلتها تشعر بعظمة مصر الجديدة وما وصلت إليه من تقدم وتنظيم يليق بحضارتها العريقة ومكانتها العالمية.

وقالت مي عمر في منشور عبر حسابها الرسمي على إنستجرام: 'من وأنا طفلة صغيرة، كان عندي حلم أزور الأهرامات وأحس بعظمة المكان ده. وفعلاً زرتها لأول مرة من أكتر 20 سنة، وقتها كانت لحظة سحرية عمري ما نستها.. النهاردة، بعد كل السنين دي، رجعت أزور الأهرامات من تاني… ومن اللحظة الأولى انبهرت بالتطور الرهيب اللي شفته. شفت قد إيه المكان اتحول لمزار سياحي عالمي بمعنى الكلمة، المكان بقى منظم، جميل، راقي وكل تفصيلة فيه بقت بتحكي مش بس عن تاريخنا، لكن كمان حاضرنا اللي بنفخر به'.

وأضافت: 'وده كله بفضل المجهود الكبير اللي اتعمل، والقيادة اللي آمنت إن مصر تستحق تكون في المكانة دي.

كل التقدير والاحترام لفخامة الرئيس عبد الفتاح السيسي، اللي بيشتغل بكل إخلاص علشان يرفع اسم مصر، ويخلي كل مصري يحس بالفخر في كل خطوة وفي كل لحظة.. شكرًا لأنك رجّعت لمصر هيبتها، وجمالها، ومكانتها اللي تستحقها'.

وختمت مي عمر منشورها برسالة مؤثرة تعبر عن تطلعها الكبير للحظة افتتاح المتحف المصري الكبير، قائلة: 'مستنية من كل قلبي لحظة افتتاح المتحف المصري الكبير… لحظة هنعيش فيها فخر جديد، ونشوف حضارتنا العظيمة وهي بتتجدد قدام عيون العالم كله.. مصرية وأفتخر'.

وتفاعل عدد كبير من متابعي الفنانة مع منشورها، مؤكدين على شعورهم بالفخر والانتماء ذاته، مشيدين بكلماتها الصادقة التي عبّرت عن حبها العميق لوطنها وإعجابها بالتطور الذي تشهده مصر في عهد الرئيس عبد الفتاح السيسي، خصوصًا في مجال السياحة والآثار والمشروعات القومية التي أعادت لمصر بريقها أمام العالم.