كشف الفنان جاد شويري كواليس أعماله الغنائية، وسبب عدم تقديمه أغنية «جنني» بدلًا من المطربة إليانا.
قال جاد شويري في لقائه مع الإعلامية شيرين سليمان ببرنامج سبوت لايت المذاع على قناة صدى البلد، عن أغنية جنني للمطربة إليانا: «اللحن كان جاي من إليانا والتيم بتاعها وطلبوا مني أول حاجة ألاقي حد يكتب على الفكرة اللي عندهم، حد مصري كده من الشارع المصري فعملت كده، أخدت حد من الشارع المصري، وكتبت واحدة عندي في الأشرفية في بيروت فأخدوا بتاعتي».
وأضاف: «اتبسطت أوي.. وأول حاجة قلت هيقولوا ده لبناني كاتب مصري قلت أنا هدخل حد معايا مصري من صحابي كده يساعدني في أي حاجة مش مظبوطة، اللي هو كريم ياسين صاحبي أوي ساعدني بالموضوع، لكن الأغنية لايقة على إليانا ومبسوط إني ساهمت بيها يعني».
واستكمل جاد شويري: «حبيت ألبوم الإلكتروني بتاع أحمد سعد وألبوم عمرو دياب، وحضرت حفلة لتامر حسني في الساحل اتعزمت عليها وبحبه أوي على المسرح، وسمعت لتامر عاشور في شياكة في كل حاجة بيعملها وبحب الحاجات الجديدة من تووليت لزياد ظاظا، ليجاسي، سانت ليفانت».
وأضاف: «فكرة الديو بلاقي أنها تكون تحدي مع أي حد مش شبهي، يعني ممكن أعمل مع عصام صاصا، بلاقي الحاجات أوقات اللي بيعملها تحفة، وممكن أعمل مع سميرة سعيد، بحب سميرة سعيد، متمردة، مزيكتها إيه المزيكا الحلوة بتدور على أي حاجة جديدة وبتخاطر بيها، أنا بحب أطلع مع الفنانين إن كان حتى في ديو مش بس في الإخراج، بحب موهبتي إن أنا أنور اللي جنبي».
وأشار إلى أن الفنان أحمد سعد هو أكثر فنان يضحكه، وتحدث عن موقف جمعهما، قائلًا: «إحنا أوقات على تواصل، قلت له أنت واخد كل حاجة، واخد جاد شويري على محمد رمضان واخد عمرو دياب على معرفش إيه، كل حاجة واخدها مرة واحدة.. صوت مميز وجبار واختيارات، أنا عشان بحبه أوي، قليل أخد خطوة أكلم فنان بس مع أحمد سعد عملتها».
وتحدث عن جدل أغنيته مع ماريا التي عرضته لانتقادات وشتائم وقت طرحها، قائلًا: «اللي عمل الجدل الكبير هو لأنه كان في إقبال كبير عليها، والناس الموضوع مستفزها، مع إنه إذا بتحضريها هي الإثارة الفكرة، فهو اللعب أكتر على خيال المشاهد، ده اللي خلى الأولاد مش شايفين أي حاجة، شايفين بنت كده طلعت تلعب ما شافوش يعني النية دي كانت أكتر عند خيال الناس».
وقال جاد شويري عن نشأته وخلفيته الفنية: «الخليط الظاهر في أعمالي كان في شخصيتي، في المحيط بتاعي ومجتمعي، الحاجات اللي بحضرها، أنا كنت بحب أسمع مزيكا كلاسيكية وبحب أسمع مادونا، بريتني سبيرز، جاستن تيمبرليك، إيمينيم، ومايكل جاكسون، بسمع الغرب قاعد في بلد عربي، ثقافتي غربية بتكلم فرنسي في البيت، في مدرسة فرنسية، رجعت كمان درست في الجامعة في باريس أخدت منحة ودرست سينما، وفي نفس الوقت بحب المزيكا الخفيفة والراب، أنا لبناني عربي بس الثقافة الغربية كبيرة أوي، عملت المزيج ده والمزيج ده حقيقي مش مصطنع، وعشان كده الناس حتى اللي يمكن مش متفقة معايا في حاجات كتيرة بس تحس إني حقيقي وممكن تحبني من غير ما يكون كل حاجة عاملها أو بقولها تكون متفقة معايا».
واختتم: «بحب أقرأ كتير وكنت متفوق في الجامعة وفي المدرسة، لدرجة إني عملت محاضرة في الجامعة الأمريكية في بيروت قبل بشهر من ما تنزل أول أغنية ليا، من ورا دراساتي وعلاماتي خلوني أقدم محاضرة في الجامعة الأمريكية عن الفن وتاريخ الفن وتأثير الفن، ومن بعد المحاضرة عميد الجامعة والتلاميذ اللي معايا أكبر مني لأني بعمل محاضرة ليهم، يعني أنا عمري 21 سنة كنت لسه متخرج بالليسانس، فقالي العميد عايزينك تبقى السنة كلها وبنتفق على حاجات، وبعد كده نزلت الأغنية ماردش بعدها.. أنا بحب شغلي وبعرف أتطور، ولما حاجة ما بكونش مبسوط بيها، ما بتطلعش من قلبي فابتديت أتجنبها يعني في حتى أغاني كمخرج بتجيلي بقول لأ وبعتذر بس بحس لو حاجة مش حاببها مش هيطلع مني في أحلى حاجة، وعشان كده خسرت فلوس كتير».
