أخدت عزاك يا أحمد أودام مصر كلها.. مواجهة ساخنة بين صابرين وابنها بعد دعوتها عليه أمام الكعبة

مواجهة كبيرة بين أم وابنها على الهواء مباشرة، بين السيدة صابرين، التي دعت على ابنها أمام الكعبة، خلال حلقة «تفاصيل» المذاعة على قناة صدى البلد 2 تقديم نهال طايل.

بدوره، قال أحمد مسعد، نجل السيدة صابرين التي دعت على ابنها وزوجته أمام الكعبة: مكنتش أتخيل أن أمي تدعي عليا أودام الكعبة، ولأول مرة أشوفها بعد 26 سنة تدعي عليا، وهي زعلت مني بسبب أني حبيت أعتمد على نفسي؛ بسبب الحياة الصعبة اللي عشتها».

الأم ردت عليه قائلة: «خطبت له من دمياط الجديدة وكنت أنا وطليقي بنصرف عليه وهو في الجيش، وفي الآخر مراته قالت لي روحي يا مره يا بنت كذا»

وأضاف أحمد مسعد خلال مداخلة هاتفية ببرنامج تفاصيل المذاع على قناة صدى البلد 2 تقديم نهال طايل: أمي فتحت لي مشروع محل ترزي، وكنت بديها من المكسب، وأمي سبت وشتمت مراتي وحاولت أهدي أمي لكنها عصبية ومش بتستحمل لنا أي كلام».

وتابع: «ضربتني بالشسبشب علشان زوجها في نص الشارع علشانه، وسبب الخلاف الرئيسي مع أمي هو «مهاب» اللي لا هو أخويا من أب ولا أمي، ولكن أمي لو جرى لها حاجة توجعني، وعمري ما استغنى عنها، وليلة الإسراء والمعراج دعيت لها، أن يردها ونتصالح ويهدينا لبعض».

ردت الأم قائلة: ضربته بالشبشب لما قال لي أنا هقتل طليقك، وقلعت اللي في رجلي واديت له في الشرع، وماسمحلوش أنه يتكلم كلمه عن «مهاب أخوه»، ومراته قالت له يا أنا يا أمك، ورب محمد اللي حطيت إيدي على بابه دا حصل.

واختتم قائلا: «مراتي ما قالتش لي يا أمك يا أنا.. ماسمعتش منها الكلام دا.. وروحت لها علشان أصالح لها.. وضربتني بالتليفون في دماغي أودام الناس في الشارع.. واتوجعت لما شفت دعوتها عليا.. وقلت لها جزمة مراتي أشرف منك لما ادعت على شرف مراتي وقالت لي أنت بتطلع مراتك وبتاخد عليها فلوس».

الأم اختتمت باكية قائلة: كان جاي يشد مني التليفون أودام الناس، وروحت ضارباه على دماغه فعلا.. وقالي جزمة مراتي فوق دماغك.. وأنا على الملأ بقول ابني مات.. حسبي الله ونعم الوكيل.. مش مسامحاك لا دنيا ولا آخرة.. أخدت عزاك يا أحمد أودام مصر كلها».