عصام شكري بعد غياب 14 عاما: رفضت أعمال دون المستوى وحذفت مشاهد لنفسي

تحدث الفنان عصام شكري عن غيابه من الساحة الفنية أكثر من 14 عامًا، قائلًا: «اكتشفت إن أنا وجيلي مسميينا جيل الدراما الذهبي، وبضحك وبقول هو إحنا كنا بنشتغل في الوقت ده في ظل كل الظروف تلف الأيام ويتقال علينا كده؟».

وتابع الفنان عصام شكري في تصريحات تلفزيونية له: «اللي بشوفه دلوقتي مافيهوش اللي كنا بنعمله زمان، ودلوقتي بسمع إن المسلسل بيتكتب وفي نفس الوقت بيتصور، زمان كان بيتكتب المسلسل قبل ما يبدأ التصوير، وكان في حاجة اسمها بروفات ترابيزة.. وأنا اعتذرت عن حاجات كتير الفترة اللي فاتت بسبب أن كان بيبقى مكتوب بس 5 حلقات من المسلسل، وأنا متعود إني بقرأ المسلسل كله قبل ما أدخل».

تصريحات الفنان عصام شكري

واستكمل: «فأنا مش عارف هل رمضان بييجي فجأة؟ ما نكتب بدري ونبقى جاهزين.. وطلع عليّ إشاعة أني سافرت وبقيت مقيم في الإمارات وده عرفته بالصدفة بعد اختفائي بـ 3 سنين، وأنا ضد نظرية المؤامرة ومبتشغلنيش، وكل اللي حصل أن سنة 2010 خلصت شغلي وروحت اتفسحت في الإمارات مش أكتر من شهرين ورجعت».

وقال عصام شكري عن غيابه واختفاءه من الوسط الفني أيضًا: «أنا مش قادر أعرف السبب الحقيقي لاختفائي، ولكن ممكن بسبب أن الورق مش جاهز، وكان في أعمال بتتعرض عليّ كانت دون المستوى، وأنا أصغر من أني أقول الأعمال اللي موجودة دلوقتي دون المستوى، وأنا اتعودت أني مشتغلش الحاجة إلا لما أكون حاسسها أوي».

عصام شكري

غياب عصام شكري عن الساحة الفنية

وأضاف: «ومش مفترض أن كل الأعمال تكون كويسة أو هايلة، لكن في هدف عايزين نحققه، وكان في أعمال كتير كان نفسي أنا اللي أعملها وكان عندي غيرة الممثل مع أن الزميل عامله حلو، بتبقى غيرة فنية شوية والدور مكتوب حلو، فكان بيبقى نفسي أعمله».

وعن مصدر رزقه بعيدًا عن الفن، قال: «أنا عملت مشاريع كتير وفشلت وبعمل مشاريع تاني لأني عندي أولاد، وكان لازم أتصرف، وده بالإضافة أني موظف في مسرح الدولة، وغيابي عن الفن زعلني وقطعني، لأني كنت عايز أمثل من وأنا عندي 12 سنة وكنت بحلم باليوم اللي أمثل فيه، أنه يحصل فجأة مفيش تمثيل طيب إزاي حد يفهمني لو غلطت في حاجة علشان معملهاش تاني، وفي زملاء أنا حزين أنهم مش موجودين، وعارف قد إيه هما بيحبوا المهنة».

واختتم الفنان عصام شكري: «أنا كنت بشيل مشاهد لنفسي، لأن كنت بلاقي المؤلف عامل مشاهد وأنا فيها وأنا كنت ببقى قايل المعنى ده في مشهد قبل كده وكنت بشيل المشاهد والمخرجين كانوا بيستغربوا مني وكنت هشتغل في حديث الصباح والمساء ومضيت عقده، وحصل تغييرات والدور بتاعي اتشال كله».

عصام شكري