باهر السعيد يعدد مزايا وعيوب كحك العيد.. ويحذر مرضى السكر والضغط من خطورته

عدد الدكتور الصيدلي باهر السعيد، مزايا وعيوب كحك وبسكويت عيد الفطر المبارك، مؤكدًا أنه عادة من أقدم العادات المصرية الأصيلة، ويتمتع بالكثير من المزايا وعلى النقيض أيضًا العيوب، محذرًا من عدم الإفراط في تناوله، لا سيما وأنه يسبب زيادة في الوزن والدهون.

وكتب باهر السعيدـ عبر حسابه الشخصي على موقع التواصل الاجتماعي «فيسبوك»: «أظرف حاجة فينا كمصريين اننا ما بنكتفيش بكمية الكنافه والقطايف والحلويات الشرقيه اللي زودت وزننا في رمضان، لا ده احنا بنختمها كمان في العيد بكحك العيد.. وكحك العيد «الكحك أوالغريبة أو البتيفور أو البسكويت» من أقدم العادات المصرية الأصيل».

وأضاف: «الحلو في الكحك.. كحك العيد هو بيحتوي على عناصر غذائية مفيدة زي الكربوهيدرات والبروتين (البيض) والدهون، وبعض الإضافات الغذائية الطبيعية اللي بتديله الطعم والرائحة، وكمان بيبقي فيه عسل، فيه الأنواع المختلفة من المكسرات اللي مليانة فيتامين E المعروف بقوته المضادة للأكسدة وأهميته في مقاومة أمراض القلب وتصلب الشرايين، وريحة الكحك نفسها بتزود إفراز العصارات الهاضمة وتنبيه المعدة والإثنى عشر عشان تزود نشاطها وده بيزود هضم نشويات ودهون الكحك، وبيضاف أعشاب طبيعية للكحك زي 'الحلبة، القرفة، القرنفل ، الحبهان ، وغيرها'، وده بيقلل الإحساس بالتخمة والانتفاخ بعد أكل الكحك، والخميرة اللي بيتعمل منها الكحك بتحتوى على فيتامين B».

وتابع: «الوحش في الكحك.. أنت لو عرفت إن السعرات الحرارية في الكحكة الواحدة تقريبًا 400 سعر حراري بيساوي رغيفين عيش كاملين، هتعرف علطول إيه اللي ممكن يعمله فيك كيلو الكحك اللي بتقعد عليه ما تسيبوش إلا أما يخلص.. والإفراط فى كحك العيد بيتخن طبعا، لأن الكحكة الواحدة بتتكون من 35 % نشويات و30 % سكريات و35 % دهون، ولما تاكل كمية منه بتمنح الجسم طاقة أكثر من احتياجه اليومى، وزي ما قولنا الكعكة الواحدة بتدي الإنسان حوالى 400 سعر حرارى، والغريبة 120 سعر حرارى، والبيتي فور الواحدة 90 سعر حراري».

واستطرد باهر السعيد: «بالنسبة للبسكويت المصنوع من دقيق وسمن وبيض وسكر يعتبر أقل في السعرات الحرارية وأكثر اعتدالًا لاحتوائه على البروتين وكربوهيدرات ودهون بكميات أقل، بالتالي لا يصيب الجهاز الهضمي بارتباك إذا تناوله الإنسان لكن بدون إسراف، واحتياج الإنسان اليومي من السعرات الحرارية من 2000- 1600 سعر حرارى بياخدها من جميع الوجبات الغذائية طول الـ24 ساعة، يعني 4 كحكات بيدوك كل احتياجات الـ24 ساعة».

وحذر السعيد، قائلًا: «الكحك خطر على مرضى السكر، وممكن لو كترنا منه يعمل انسداد شرايين القلب نتيجة ترسيب الدهون على جدرانها وخاصة عند مرضى السكر والقلب بشكل خاص»، مضيفًا «وجبة إفطار يوم العيد لازم تكون خفيفة، يعني بلح فطرة، نص رغيف مع حتة جبنة، كده يعني ، ما تدخلش ع التقيل كده علطول، وبلاش مشروبات غازية نهائي طول اليوم، ولما تروح تعيد علي قرايبك، لو قعدت تاكل من اللي بيتقدملك عند كل حد بتزوره أكيد هتجيلي زيارة للصيدلية وأنت بتشتكي من تلبك معوي أو نزلة معوية».

واستكمل حديثه: «طيب تعمل إيه عشان تاكل كحك لو أنت مصر.. خلاص كل كحك بس خد بالك، الاعتدال فى أكل الكحك، وتقليل نسبة السمن والدهون المستخدمة، وأن تكون السمنه نوعيتها جيدة وغير المهدرجة فى تصنيع الكحك عشان يبقي صحي، وكفاية أوي كحكتين فى اليوم على فترات زمنية متباعدة أو تناول كحكة وقطعة غريبة وقطعة بيتي فور خلي بالك ده بيعطى الجسم نصف ما يجب أن يحصل عليه من طاقة طوال اليوم وأكثر من 40 % مما يجب أن يتناوله طوال اليوم من دهون غذائية».

واختتم باهر السعيد: «لازم تاكل قبل أو بعد الكحك مباشرة أغذية غنية بالألياف لأنها تقلل من امتصاص الدهون، مثل الخضروات والفاكهة كالبرتقال والجزر والتين، أو الترمس أو الحلبة المنبتة، وشرب الحلبة أو القرفة بعد الكحك يجنبنا آثاره الضارة لأن الحلبة تحتوى على مادة 'الجلاكتوفتان' اللي بتخفض مستوى السكر والكوليسترول فى الدم وتناول مشروب القرفة بيسهل هضم المواد الغذائية الدسمة التى تدخل فى إعداد كعك العيد».

حسام موافي يحذر مرضى الضغط والسكر من تناول كحك العيد.. فيديو

طريقة عمل كحك العيد بالعجمية.. فيديو