كريم العدل ينتقد عملا وشركة منتجة صوروا ٥٤ ساعة متتالية: مين يتحمل المسئولية؟

إسماعيل هاني 10 ابريل 2023 | 04:30 صباحاً

انتقد المخرج كريم العدل، فيلما سينمائيا وشركة انتاج قاموا بالتصوير 54 ساعة متتالية، والمفاجأة أنه فيلم وليس مسلسل مرتبط بشهر رمضان.

كريم العدل: بنحارب اننا مش هنصور أكتر من ١٤ ساعة

وكتب كريم العدل، عبر حسابه على فيسبوك: أنا ومخرجين كتير غيري، بنحارب طول الوقت على فكرة اننا مش هنصور أكتر من ١٤ ساعة في اليوم اللي هو أصلا كتير على فكرة- غير في الضرورة القصوى،وفجأة نتفاجئ بأوردر تصوير بيبدأ الساعة ٤ فجر الجمعة.. وبيخلص الساعة ١٠ صباحا يوم الأحد؟! ٥٤ ساعة؟!.

وتابع كريم العدل: والمفاجأة بقى انه (فيلم) كمان مش مسلسل مثلا، فمضغوطين علشان يسلموا الحلقات في رمضان ولا اى حاجة - رغم ان برضه المبدأ مرفوض تماما بس يجوز تفهمه- فيعني ايه؟ وازاي؟ وليه الناس موافقة؟ ومين اللي إدى الحق للمنتج او المخرج انهم يعملوا اوردر ٥٤ ساعة؟؟ ويعني ايه ممثل يقف قدام الكاميرا وهو بقاله فوق ال٤٨ ساعة ما بينامش؟؟ يعني ايه كرو إضاءة وپانثر يبقوا بيشيلوا معدات ويحطوا وينزلوا ويطلعوا لمدة تفوق ال٤٨ ساعة؟؟ طيب فين النقابة؟؟ وهل السوق ده بقى ماشي بالسخرة؟ هل الكرو تحول الى عبيد بالنسبة لكم؟! طيب هل المنتج هيدفع اجر الناس يومين و نص ولا ٣ ايام ولا هيدفع بزيادة علشان يعوضهم؟!.

كريم العدل: لو حد مات.. مين اللي هيتحمل المسؤولية؟

واستكمل كريم: طيب لو حد بعد الشر جرى له حاجة ولا مات -و شوفناها و حصلت قبل كده- مين اللي هيتحمل المسؤولية؟ طيب لو المخرج -اللي انا شخصيا اول مرة اسمع اسمه- مش خايف على نفسه ولا على شغله ولا على صحته، احنا ذنبنا ايه؟ هو مش فاهم انه بيضر السوق كله؟ وان غالبا بعد شوية ده بيتحول للعادي، وان طالما حصلت مرة يبقى ليه ماتحصلش تاني؟ مش فاهم ان عنده زملا بيحاربوا في كل مشروع سواء فيلم او مسلسل علشان مايحصلش في الكرو بتاعهم كده؟!.

وأضاف كريم العدل: عامة أنا أول مرة اسمع اسم المخرج، واول مرة اسمع اسم شركة الانتاج.. ومع كامل احترامي ليهم احب اقول لهم حرام عليكم وعيب.. واحب اقول للصناع والكرو والناس اللي ورا الكاميرا من فضلكم ماتسكتوش يا جماعة.. ده مش عادي ولا طبيعي!! كفاية عبث في الشغلانة… العبث اللي فيها مكفيها والله.

كريم العدل