«مسرح إيه اللي وقعت عليه».. حمو بيكا يكشف حقيقة سقوطه أثناء الغناء.. فيديو

انتشر فيديو، خلال الساعات الماضية، يُظهر سقوط مطرب يشبه مؤدي المهرجانات حمو بيكا من على خشبة المسرح، وتداوله رواد مواقع التواصل الاجتماعي بشكل واسع.

وأوضح حمو بيكا في بث مباشر عبر صفحته الشخصية على موقع التواصل الاجتماعي فيسبوك، ردا على الفيديو، أنه ليس المطرب الذي سقط من على المسرح، مشيرا إلى أن موسيقى الفيديو المتداول أجنبية وهو لا يغني هذا النوع من الموسيقى.

وقال «بيكا»: «أنا الحمد لله بخير وسلام وفي السعودية عندي حفلات هناك، وطالع أقول الكلمتين للناس اللي مبتحبليش الخير.. مسرح أيه اللي وقعت عليه، واللي كانت شغالة دي مزيكا أجنبي، هو أنا بغني أجنبي؟».

وتابع حمو بيكا: «صحيت لقيت أخبار كتير، عشان تعرفوا إن بعض الأخبار تكذب، وأي جريدة تكتب كلام انتوا كدا عرفتوهم، ومش أنا اللي كنت في الحفلة دي أصلا، ولا وقعت من على الاستيدج ولا أي حاجة، والكلام عن إن الحفلة كانت في دبي فشر، وأنا في السعودية ومش فاضي».

ووجه مؤدي المهرجانات رسالة لجمهوره قائلا: «عايز أوجه رسالة لكل إخوتي اللي خافوا عليّ، أنا بحبكم، وعايز كمان أوجه رسالة للناس اللي بتنفسن وبتبص لعيشة الناس ومش حابة عيشتها، واللي يبص لعيشة الناس تحرم عليه عيشته، وميعشهاش تاني، واللي بيتكلم عليّ كلمة وحشة تقعد له وتقعد لعياله وعافيته وعائلته، واللي بيتكلم عليّ كلمة خير بتمنى له الخير والسعادة في كل شيء».

وأضاف حمو بيكا: «اللي بيكتب عني كلمة حلوة بحبه، واللي بيكتب برضه كلمة وحشة بحبه عشان مفيش بيني وبينه غير كل احترام وود، بس مش عارف الناس عايزة إيه مني، ربنا اللي حطني في الحتة دي، أنت بقى كاره النعمة، بس أنا عمري ما أكره لك النعمة، حب الخير للغير ربنا يزيدك، وطول ما أنا شاغلكم ربنا هيفضل معليني».

وعن منعه من الغناء داخل مصر، قال مؤدي المهرجانات: «لقمة عيشي اتمنعت في مصر ومبغنيش فيها بس ربنا بيبعت لي رزقي من حتة تاني، ومش هقول إني فاتح بيوت لأن كل دا معروف، والحمد لله ربنا كرمني، وبعمل مشروعات، داخل مصر وخارجها، بحبكم وربنا يخليكم لي، وأنا بخير.. وانتظروني أنا وعمر كمال في أغنية جديدة، وسنة سعيدة عليكم».

حمو بيكا بعد تحقيق أغنيته «ضحكتها مزيكا» 11 ألف مشاهدة: «هقفل كل قنواتي واعتزل المهرجانات»