منى زكي تكشف أسرارها مع أحمد زكي: حطني في مكانة أكبر مني

ياسمين حمادة 31 مايو 2023 | 10:40 مساءً

تحدثت الفنانة منى زكي عن حبها لنجوم الزمن الجميل مثل السندريلا سعاد حسني والنجم الكبير أحمد زكي، قائلة: «هو في حد مبهج زي سعاد حسني الله يرحمها!!.. مفيش حد زيها وكل نجومنا زمان قمرات.. ولما بشوف صور سعاد ونادية لطفي وأفلامهم بقول إيه الجمال ده!».

تصريحات منى زكي عن أحمد زكي

قالت منى زكي في تصريحات تلفزيونية لها: «أحمد زكي هو الأسطورة الحقيقي ويليه الفنان محمد ممدوح، وزكي اللي نتعلم منه وهو النجم اللي فاهم أهمية الفن وكان هو كل حياته، واتعلمت منه حاجات كتير».

وتابعت: «الأستاذ أحمد زكي حطني في مكانة كانت أكبر مني ومن موهبتي وقتها، وبعدها حبه حبه بدأت أثق في نفسي وتمثيلي، وكنت زمان بتضايق لما أتفرج على نفسي عشان كنت بشوف عيوبي بس، وعيوب شكلي».

منى زكي

ذكريات منى زكي

وقالت أيضًا: «كان كل حاجة تشتت ذهني، دلوقتي بقيت بتفرج على نفسي بعد ما أخلص تصوير، زمان كان عندي طموح كبير وصممت على اللي عايزاه لأن أي حاجة بحبها بفضل وراها لحد ما أعملها وأفضل وراها لحد ما أجيب أخرها واعملها بأحسن شكل».

وكشفت الفنانة منى زكي موقفها من الموسيقى قائلة: «بسمع كل حاجة من أول أم كلثوم لحد ويجز ومروان بابلو، ونجومي المفضلين عمرو دياب ومحمد منير وأنغام وشيرين وحماقي كل دول أساتذة بحبهم».

واستكملت حديثها عن التحديات التي تواجهها: «نعمة كبيرة من ربنا إني أشتغل الحاجة اللي بحبها، لكن دا ميمنعش إن فيه ضغوطات في الحياة، فكلنا عندنا ضغوطات ومشاكل بس بنسب مختلفة، وإحنا دورنا كفنانين متمسكش في إحساس واحد، ومينفعش تظهر مضغوط طول الوقت، لأن في التصوير لازم تبقى حالة تانية بعيدة عن مشاكلك».

وأشارت إلى أن الفنان من الممكن أن ينزل إلى التصوير على الرغم من معاناته من حالة وفاة أو مشكلة كبيرة، دون أن يظهر ذلك، معلقة: «إحنا أحيانًا بيبقى عندنا حالات وفاة وبننزل نشتغل، والمفروض منبينش دا للناس مش مجرد شوية مشاكل أو ضغط، ومش بنعمل كدا عشان نمثل عليهم، ولكن شغلتنا لازم إنك تتغاضي عن نفسك وأنت فيك أي، وتدخل عوالم الشخصيات اللي بتمثلها».

منى زكي