محمد سامي يشيد بـ منى زكي: نجمة لا تُقارن ويصعب تكرارها

أشاد المخرج محمد سامي بالفنانة منى زكي، وذلك بعد مكالمة جمعتهما.

كتب محمد سامي في منشور عبر حسابه الرسمي بموقع فيس بوك: «ليه منى زكي؟.. كنت بتكلم مع منى زكى بسلم عليها وقعدت أتكلم معاها شوية، و أدخل من موضوع لموضوع وبعدما قفلت سألت نفسي أكثر من سؤال، ليه منى زكي فارقة كتير؟، ليه عندها بريق من نوع خاص، ليه هي النجمة الأهم والموهبة الأكبر، ليه هي سابقة جيلها بفرق كبير جدًا رغم إن جيلها قوي وفيه زميلات نجوم حقيقيين علي جميع المستويات وموهوبين وناجحين وقدموا أعمال مهمة».

محمد سامي يشيد بـ منى زكي

وتابع: «ولكن محدش وصل لأنه يبقى منى زكي، ليه فضلت من أول يوم ليها كممثلة لحد النهاردة أيقونة يصعب تكرارها أو القرب من حجم اسمها ومكانتها علي المستوى الفني أو على مستوي النجومية والموهبة أو حب الجمهور، ليه منى زكي أكثر ممثلة تصدقها وتتوحد معاها، ليه لو فكرت في ممثلة تلاقي صورة منى زكي هي أول صورة تيجي في بالك، بإختصار لأن منى زكي مثقفة متعلمة راقية متطورة مش بتمثل وخلاص ولا بتظهر وخلاص ولا بتتكلم وخلاص ولا مهتمة بتفاصيل الناس الفاضية، ست كلامها مرتب واسألتها ليها معنى وهدف وأنا بتكلم معاها مابلاقيش لحظه من النقاش دخل في جدل بلا هدف أو كلام من أجل الكلام وخلاص».

واستكمل المخرج محمد سامي: «الست دي وهي بتتكلم عن الفن تحب تسمعها ولما توصف الفن تفرح إنك تنتمي ليه من طريقة كلامها عنه، لما تناقش معاها أي موضوع تلاقي وعي وحكمة وتحضر وثقافة، ست ناجحة وزوجة وأم ناجحة، لما تتفرج على أي مشهد ليها بتلاقيها خلته مش عادي، بتشوف تحضير ومذاكرة ورؤية ومجهود واضح وعلام وعقل مترتب وده بيبان في أصغر التفاصيل، بتقدم أي مشهد صعب ببساطة وشياكة من غير تصنع أو تشتيت، طريقتها في النقد شيك وتبسيطها لصعوبة أدوار عملتها بيدل علي ثقتها في نفسها اللي بلا حدود، حتى لما نبص للقاءاتها أو لدورها في المجتمع أو كلامها في ندواتها حتى في الإعلانات اللي قدمتها أو أفلامها ومسلسلاتها أو لبسها في أي ظهور ليها حتى لو مش رسمي هتلاقيها بتعرف تنتقي وهتلاقي دايمُا في جودة ورمز مشرف للست المصرية».

تصريحات المخرج محمد سامي

واختتم: «بجد الكلام على عظمة منى زكي صعب يخلص في بوست، بس حسيت بعدما قفلت معاها إني عايز أكتب كده من كتر ما استمتعت بالكلام معاها كالمعتاد، يا بخت الفن المصري والعربي بنجمة النجوم منى زكي، ويا بخت كل فنان وفنانة حضرها ونسب لفترة هي فيها، يا بخت كل زمايلها اللي من جيلها إنهم من جيل منى زكي ويا بخت كل ممثلات الجيل اللي بعدها إنهم عندهم منى زكي يتعلموا منها خاصة إنها جيل أكبر بس عشان بدأت صغيرة إنما مش أكبر منهم سنا بالعكس ما شاء الله عليها قمر وفي عز شبابها ومحافظة على شكلها وأناقتها، ربنا يديم علي الفن نعمة منى زكي ودايمًا ناجحة ومتفوقة وبتمتعنا بكل دور بتقدمه وكل مشهد بتأديه، بحبك يا عظيمة ياللي حببتينا ولسه بتحبيبنا أكتر في مهنتنا».