ياسمين عز تكشف كيفية التعامل مع الزوج في رمضان: بلاش تستفزي الفرعون وأنسى السوبيا

ياسمين حمادة 18 مارس 2023 | 09:22 مساءً

وجهت الإعلامية ياسمين عز مجموعة نصائح جديدة للسيدات، وكشفت أيضًا كيفية التعامل مع الزوج في رمضان، وذلك بالخطوات، قائلة: «بلاش تستفزي الفرعون».

نصائح ياسمين عز في رمضان

نصائح ياسمين عز في رمضان قالت في تصريحات تلفزيونية لها: «بلاش تستفزي الفرعون بسؤال: أعملك إيه على الفطار ومش لازم تطلبي منه سوبيا في الوقت ده، ومن أول رمضان إعملي حسابك في طبق أكل زيادة كل يوم يروح لصاحب نصيبه».

وتابعت الإعلامية ياسمين عز قائلة: «مفيش حاجة اسمها قفطان لكل عزومة»، وحذرت من الإفطار أول يوم رمضان عند والدة الزوجة بمفردها، قائلة: «يعني إيه تدخلي على مامتك في أول يوم برمضان وأنتي بطولك من غير فرعونك وتاج راسك».

تصريحات ياسمين عز

وأضافت ياسمين عز: «إزاي يجيلك قلب تسيبيه يفطر لوحده.. مين يا هانم هيقطعله حتة البشاميل من على حرف الصنية زي ما بيحبها، أنت فين يا مدام.. هتقوليلي أخواته؟.. أخواته كل واحده هتكون مهتمه بجوزها وخطيبها على السفرة وحماتك مهتمية بجوزها اللي هو الفرعون الأكبر».

وقالت أيضًا: «فلو سمحتي مفيش حاجة اسمها هفطر عند مامتي، وأنت أفطر عند مامتك لا رجله على رجلك.. من الشهر ده تطبقي القواعد دي عايزين نعدي الشهر بخير وسلام».

واستطردت ياسمين عز حديثها: «لازم تعزمي أهل جوزك مفيش حاجة اسمها العزومة تقيلة على قلبك، أهل جوزك زي أهلك وانتهزي الفرصة تصلحي علاقتك بحماتك، ولو هتعملي فرخة لمامتك إعملي بطة لحماتك ويارت تقللي فطار وسحور بره البيت وفري الفلوس لزوجك وأولادك ولما تتفرجي على المسلسلات متحرقيش له الأحداث».

ياسمين عز

نصائح الطبخ لـ ياسمين عز

وفيما يخص نصائح الطبخ لـ ياسمين عز التي طرحتها سابقًا، حيث قالت: «الراجل لما بيروح يطلب إيد واحدة في الأصل زمان قالوا إن الأصل في هذا الأمر أن الإيد هي اللي بتطبخ، لذلك جرت العادة على تكرار هذه الكلمة.. يا عمي أنا طالب إيد بنتك».

وتابعت: «الطبخ أهم حاجة في الزواج ومن أساسياته.. طبعًا هيردوا علينا ويقولوا هي الجواز طبخ بس وأن الطريقة دي مش هتجبلك جوازة كويسة».

واستكملت ياسمين عز قائلة: «أنتي عندك في الحياة نعمتين الأولى جوزك وبعدين الأكل والشرب بعده.. عشان تخلي الأولوية في رمضان ليه، ومش عايزة حاجة اسمها مش هاكل أكل بايت ليه مش هتاكلي بايت سيبي الأكل لتاني يوم وبعد كده سخنيه».

الإعلامية ياسمين عز

اختتمت قائلة: «اهتمي بجوزك يسري ويمري على قلب الفرعون ومتعمليش 9 أصناف وترمي ومعدة الشخص في رمضان بتصغر والأكل المهدور في رمضان حرام بلاش منها.. عمرك ما هتلاقي زي الفرعون المصري لأن أكلك بيبقى محروق والرز معجن وهو مش بيرضى يحرجك وبيقولك تسلم إيدك عشان بيحبك».

ياسمين عز